Xalqaro olimpiya qo‘mitasi (XOQ) qo‘mita faxriy a'zosi Richard Paundning 2020 yilgi Olimpiada o‘yinlari o‘tkazilishi muddati kechiktirilishi to‘g‘risidagi bayonotini rad etdi.

Qayd etilishicha, Paund shunchaki o‘z nuqtai nazarini bildirgan xolos.

«XOQning har bir a'zosi XOQ ijroiya qo‘mitasining qarorini talqin qilish huquqiga ega», — deyiladi qo‘mita tomonidan.

Paund Tokiodagi Olimpiada 24 iyuldan boshlanmasligi haqida 23 mart kuni USA Today nashriga aytgandi. Uning so‘zlariga ko‘ra, koronavirus pandemiyasi sababli ana shunday qarorga kelingan.

O‘sha kuni Yaponiya bosh vaziri Sindzo Abe parlamentdagi chiqishi vaqtida Olimpiada o‘yinlari koronavirus bilan bog‘liq vaziyat sababli rejalashtirilgan muddatda o‘tkazilishining imkoni yo‘qligini aytgandi.

XOQ Tokio Olimpiadasi hozircha belgilangan muddatda o‘tkazilishi rejalashtirilganini ma'lum qildi. Qo‘mita Yaponiyada koronavirus bilan bog‘liq vaziyat yaxshilanmoqda deb hisoblamoqda. Bu bo‘yicha yakuniy qaror to‘rt hafta ichida qabul qilinadi.

Tokiodagi Olimpiada 24 iyuldan 9 avgustgacha o‘tkazilishi rejalashtirilgan. Biroq ko‘plab davlatlar koronavirus pandemiyasi bilan bog‘liq hozirgi murakkab sharoitda uning belgilangan muddatlarda o‘tkazilishiga qarshi chiqmoqda.