Rossiya hukumati mamlakatda karantin rejimini qat'iylashtirish va koronavirusga chalinganlar bilan muloqotda bo‘lganlarni aniqlash hamda izolyatsiya qilish bo‘yicha choralarni kuchaytirishi ehtimoli bor. Bu haqda o‘z manbasiga tayanib RIA Novosti xabar berdi.

"Rossiyada infeksiya tarqalish tezligi Ispaniya, Germaniya, Fransiya, Buyuk Britaniyadagi kabi ketmoqda. Bu bemorlar soniga nisbatan kuniga 27 foizdan 33 foizgacha o‘sish degani. Koronavirusni jilovlashda muvaffaqiyatga erishgan Singapur, Yaponiya, Janubiy Koreya kabi davlatlar qatoriga qo‘shilish uchun karantin bo‘yicha keskin choralar ko‘rish kerak bo‘ladi", - degan agentlik suhbatdoshi.

Uning so‘zlariga ko‘ra, Rossiyada "koronavirusga qarshi samarali kurashish uchun keskin, lekin zarur choralarni ko‘rishga vaqt yetarli". 

"Rossiyada qo‘shimcha choralar qabul qilishning maqsadga muvofiqligini aniqlash maqsadida ommaviy test o‘tkazish, karantinga joylashtirish, chegaralarni yopish, ommaviy tadbirlarni bekor qilish, jamoat joylarini yopish bo‘yicha xalqaro tajriba o‘rganilmoqda", - dedi agentlik suhbatdoshi.

Avvalroq Tashqi ishlar vazirligi Rossiyadagi o‘zbekistonliklarni vatanga qaytarish bo‘yicha ma'lumot bergandi.