Abxaziya markaziy saylov komissiyasi yangi prezident saylovlari sanasini belgiladi. Bu haqda “RIA Novosti” axborot agentligi xabar berdi. 

Ma'lum qilinishicha, yangi saylovlar 22 martga belgilandi. Bu haqda komissiya raisi Tamaz Gogiya ma'lum qildi. 

Uning ta'kidlashicha, ushbu saylovlar yuridik jihatdan takroriy saylovlar deb ataladi, biroq unda istalgan nomzodlar ishtirok etishi mumkin.

Abxaziyada 9 yanvarda prezident Raul Xajimbaning ma'muriyati binosiga namoyishchilar bostirib kirib, prezident noqonuniy saylangani iddaosi bilan uning iste'fosini talab qila boshlashgan. 

Abxaziya parlamenti noroziliklar ortida Xajimbaga prezident lavozimini tark etishni tavsiya qilgan.

Abxaziya oliy sudi 10 yanvarda markaziy saylov komissiyasining 2019 yil sentyabrda o‘tgan prezident saylovlari natijalari bo‘yicha qarorini noqonuniy deb topib, yangi saylovlar belgilash majburiyatini qo‘ygan.