Bugun, 8 yanvar kunidan boshlab osiyolik futbol muxlislarining diqqat-eʼtibori Tailandga qaratiladi. Ushbu mamlakatda 23 yoshgacha bo‘lgan futbolchilar o‘rtasidagi hisob bo‘yicha 4-Osiyo chempionati boshlanadi. Quyida Tribuna.uz turnirga oid eng muhim ma'lumotlarni taqdim etadi.
O‘zbekiston «o‘lim guruhi»da
Qit'amizning eng kuchli 16ta jamoasi ishtirok etadigan turnirda Tokioda o‘tadigan Olimpiada o‘yinlariga yo‘llanmalar ham o‘ynaladi. Chempionat yakuniga ko‘ra, sovrinli o‘rinlar sohiblari Tokio-2020ga yo‘l oladi.
Tailanddagi Osiyo chempionatiga O‘zbekiston olimpiya jamoasi amaldagi chempion sifatida tashrif buyuradi. Yodingizda bo‘lsa, Ravshan Haydarov boshqaruvidagi vakillarimiz 2018 yil Xitoyda o‘tgan U-23 Osiyo chempionatida qorli finalda Vetnam ustidan qiyin g‘alabaga (2:1) erishib, Osiyo chempionligini qo‘lga kiritishgandi. Turnirga qur'a tashlangach, ko‘pchilik mutaxassislar “o‘lim guruhi”, deya aynan «S» guruhini ko‘rsatishgan.
«A» guruhi: Tailand, Iroq, Avstraliya, Bahrayn
«B» guruhi: Qatar, Yaponiya, Saudiya Arabistoni, Suriya
«C» guruhi: O‘zbekiston, Janubiy Koreya, Eron, Xitoy
«D» guruhi: Vetnam, KXDR, Iordaniya, BAA
TV-translatsiya
Milliy jamoalarimiz ishtirokidagi yirik musobaqalarni translatsiya qilib boruvchi «Sport» telekanali Osiyo chempionati bahslarini ham O‘zbekistonda namoyish etish huquqini qo‘lga kiritgan. Telekanal texnik va ijodiy guruhi turnirga jiddiy tayyorgarlik ko‘rib, nafaqat O‘zbekiston olimpiya jamoasi o‘yinlari, balki turnirdagi barcha uchrashuvlarni “jonli efir”da namoyish etishni rejalashtirgan.
O‘yinlarimiz taqvimi
Qit'a chempionati 8 yanvardan 26 yanvarga qadar davom etadi. Lyubinko Drulovich boshchiligidagi O‘zbekiston U-23 olimpiya jamoasi «C» guruhida Janubiy Koreya, Eron va Xitoy olimpiya jamoasi bilan bellashadi.
Hamyurtlarimiz 9 yanvar, payshanba kuni musobaqani Eron olimpiyachilariga qarshi bahs bilan boshlashadi. 2-turda Xitoy raqiblik qilsa, 3-turda Janubiy Koreyaga qarshi maydonga tushamiz.
U-23 Osiyo Chempionati-2020.
1-tur. 9 yanvar (payshanba)
O‘zbekiston – Eron
O‘yin boshlanish vaqti: 15:15
TV-translatsiya: «Sport» TV
2-tur. 12 yanvar (yakshanba)
O‘zbekiston – Xitoy
O‘yin boshlanish vaqti: 18:15
TV-translatsiya: «Sport» TV
3-tur. 15 yanvar (chorshanba)
O‘zbekiston - Janubiy Koreya
O‘yin boshlanish vaqti: 15:15
TV-translatsiya: «Sport» TV
Chorak final. 18-19 yanvar
Yarim final. 22 yanvar
3-o‘rin uchun. 25 yanvar
Final. 26 yanvar
OFK turnirida ilk marta to‘liq tartibda VAR tizimidan foydalaniladi
Qit'a chempionati final bosqichi Tailandning Bangkok, Buriram, va Songxla shaharlarida o‘tkaziladi.
Olimpiada yo‘llanmalari tikilgan ushbu musobaqa Osiyo futboli tarixidan joy oladi. Bu musobaqa VAR (Video Assistant Referee) tizimi to‘liq tartibda foydalaniladigan ilk OFK turniriga aylanadi.
VAR tizimi dastlab, 2019 yili BAAda o‘tgan Osiyo kubogining chorak finalidan boshlab qo‘llanilgandi. Sinov muvaffaqiyatli o‘tgach, Osiyo Futbol Konfederatsiyasi 2020 yilgi Osiyo chempionati U-23ning barcha o‘yinlarida VAR tizimidan foydalanilishini e'lon qildi.
O‘zbekistondan 4 nafar hakam ishlaydi
OFK ushbu musobaqada ishlaydigan hakamlar ro‘yxatini e'lon qilgan. Unga ko‘ra, qit'a chempionatida 4 nafar o‘zbekistonlik hakam faoliyat olib boradi.
Valentin Kovalenko va Ilgiz Tantashev bosh hakam sifatida, Timur Gaynullin va Andrey Tsapenko esa qanot hakami sifatida ro‘yxatdan o‘tishgan. Umuman olganda, chempionatga 34 nafar bosh hakam hamda 26 nafar qanot hakami ishlashadi.
Mezbon shahar va stadionlar
Osiyo chempionati bahslari Tailandning to‘rtta - Bangkok, Buriram, Patum Tani va Songxla shaharlaridagi 4ta stadionda o‘tkaziladi. Musobaqaning bosh stadioni poytaxtdagi qariyb 50 ming tomoshabin sig‘adigan «Rajamangala» o‘yingohi sanalib, final va 3-o‘rin uchun o‘yinlar xuddi shu stadionda bo‘lib o‘tadi.
«Rajamangala» stadioni
Shahar: Bangkok
O‘yingoh sig‘imi: 49 722
«Buriram» stadioni
Shahar: Buriram
O‘yingoh sig‘imi: 32 600
«Tinsulanon» stadioni
Shahar: Songxla
O‘yingoh sig‘imi: 45 000
«Tammasat» stadioni
Shahar: Patum Tani
O‘yingoh sig‘imi: 25 000
Tailanddagi musobaqani Tribuna.uz va Kun.uz muxbirlari yoritib boradi
O‘zbekiston jamoalari ishtirokidagi muhim musobaqa va o‘yinlarni voqea joyidan yoritib borayotgan Tribuna.uz va Kun.uz sayti muxbirlari 6 yanvar kuni Toshkentdan Tailand poytaxtiga yetib borishdi. Olimpiadaga yo‘llanma beruvchi ushbu muhim turnirni Tailanddan eksklyuziv foto, video, jonli efirlar, maqola va intervyular bilan ijodiy guruhimiz vakillari yoritib borishadi. Shunday ekan, qariyb 20 kun davomida saytimiz va ijtimoiy tarmoqlardagi sahifalarimizdan uzoqlashmay, kuzatib boring. Tailanddagi musobaqa harorati va atmosferasini O‘zbekistondan turib his qilishingizga kafil bo‘la olamiz.
Usmon Ibodov tayyorladi.
