Сирдарёда педагогларнинг 66,8 фоизи абитурентларга имтиҳонда бериладиган тестларни қониқарсиз бажарди – Вазирлик

Жамият 21:00 / 03.12.2019 18748

«Аввало, ўқитувчиларнинг малакасини аниқлаш учун имтиҳонлар ўтказдик. Афсуски, Давлат тест маркази базасидан олинган тест топшириқларини бажарган ўқитувчиларнинг натижалари қониқарли чиқмади.

Ўртача ҳисобда 66,8 фоиз педагог ва раҳбарларимиз абитуриентларга кириш имтиҳонида бериладиган тест топшириқларини қониқарсиз бажарди. Бу жуда ачинарли аҳволни кўрсатиб берди.

Агар математик ўз ўқувчисини математика фанидан ОТМга кириш имтиҳонига тайёрлай олмаса, қандай қилиб ўқитувчига ўз фарзандимизни ишониб топширишимиз мумкин», дейди Алишер Умаров «Ўқитувчиларнинг мустақил ривожланиши, ўқитиш усулларини такомиллаштириш, малака талабларига мувофиқ танлаш» мавзусида ташкил этилган матбуот анжумани вақтида.

Вазир ўринбосарининг таъкидлашича, йиллар давомида ўқитувчиларга ўз устида ишлаш имкони берилмагани натижалар қониқарли бўлмаслиги сабабларидан биридир. Шунинг учун ҳозирда Сирдарё вилоятида очиқлик ва шаффофликни жорий этиш ишлари амалга оширилмоқда.

«Биз ўқитувчиларга агар паст баҳо олсангиз ҳам, ишдан бўшатмаймиз, аксинча, камчилигингиз асосида ўз устингизда ишлаш учун индивидуал режа тайёрлаймиз, деган таклифни бердик», дея Алишер Умаровнинг сўзларини келтирмоқда Kun.uz мухбири.

Вазир ўринбосари вилоятда ўтказилган таҳлиллар асосида аксар педагогларда битирувчилар билан ишлашда психологик тайёргарлик кўриш билан боғлиқ камчиликлар ҳам борлиги аниқланганини қайд этиб ўтган.

Кўпроқ янгиликлар