Вадим Абрамов: «Ғалабадан сармаст бўладиган ёшдан ўтганман»

Спорт 19:50 / 10.10.2019 21989

ЖЧ—2022 саралашининг иккинчи босқичи 3-турида Ўзбекистон ва Яман терма жамоалари ўртасида кечган ва мезбонларнинг 5:0 ҳисобидаги ғалабаси қайд этилган ўйиндан кейин ҳар икки жамоа мураббийлари иштирокида матбуот анжумани ўтказилди. Унда қатнашган Вадим Абрамов ўз фикрларини билдирди.

«Мухлисларни ғалаба билан табриклайман. Бугун ғалаба қозонишимиз шарт бўлгани боис йигитларда озроқ босим бор эди. Майдонда ўйнаган футболчиларга раҳмат дейман, улар вазият мураккаб эканини тушунган ҳолда ҳаракат қилишди. Ўйинимиз чиққанидан хурсандман.

Кайфиятим яхши, шунчаки ғалабадан сармаст бўладиган ёшдан ўтганман. Ўйинимизда муаммолар бўлди, шу боис йирик ҳисоб мени тинчлантира олмайди. Биз баъзи ўйлаган комбинацияларимизни амалга ошира олмадик, аммо қисқа муддатда кўп нарсани ўрганиш қийин.

Ҳисобга яраша ўйин бўлди. Гап ҳисобда эмас, баъзи хатоларимиз бўлди ва бу муаммолар катта жамоаларга қарши ўйинларда панд бериши мумкин, шу боис уларни тузатишимиз керак. Санжарнинг имкониятларини билардим, шу боис уни миллий жамоага чақирдим.

Лутфулла Тўраевни чақирганим учун кўпчилик танқид қилди, аммо у бугун майдонда бўлганида ўйинни бузиб қўймаган бўларди. Шунчаки уни чақирганимиздан сўнг Лутфулланинг кайфиятида ўзгариш пайдо бўлди. Бу «Бухоро» билан ўйинданоқ сезилди. Шу боис ўйин вақтида унда руҳий муаммо пайдо бўлишидан қўрқиб якуний таркибга киритмасликка қарор қилдим.

Марказдаги футболчилар илк марта бундай шериклар билан ўйнашди. Улардан бири илк марта миллий жамоада ўйнади, шу боис марказда муаммо кузатилди. Денисов? Унинг имкониятларини биламан. Ҳозирча у ўйин амалиётига эга эмас, бундан ташқари унинг ўйинларини кузатиш учун вақт етмаяпти»,— деб Абрамовнинг сўзларини келтирмоқда Tribuna.uz мухбири.

Кўпроқ янгиликлар