Ukraina prezidenti Vladimir Zelenskiy 7 sentyabrda Rossiya bilan mahbuslarni almashish doirasida ozod qilingan ukrainalik harbiy dengizchilar, ularning oilalari a'zolari bilan uchrashdi.

Uchrashuv Kiyevdagi Mariinskiy saroyidagi bog‘da o‘tgan. Zelenskiy harbiylarni vatanlariga qaytganlari bilan tabriklagan. U dengizchilarning yaqinlariga ko‘rsatilgan qo‘llab-quvvatlov uchun alohida minnatdorlik bildirgan.

“Ular ham siz kabi qahramondirlar. Ular sizni qaytarish uchun barcha ishni qilishdi, biz esa ularga ko‘mak ko‘rsatdik”, deb aytgan Ukraina prezidenti dengizchilarga yuzlanib.

Ukraina prezidenti asirlarni qaytarish bo‘yicha amaliyot o‘ta murakkab bo‘lganini, ushbu jarayonga ko‘pchilik jalb qilinganini ta'kidlab o‘tgan. 

Zelenskiy dengizchilarga Odessada uy-joy berish masalasi hal qilinganini ma'lum qilgan. Dengizchilar o‘z navbatida prezidentga minatdorlik bildirishgan, ulardan ba'zilari esa davlat rahbarini o‘z to‘ylariga taklif qilishgan.

Shuningdek. harbiylar Zelenskiyga qo‘lida dengizchilar ismlari yozilgan brasletlarni taqib yurgani uchun minnatdorlik bildirishgan, chunki bu dengizchilarning ozod qilinishi muammosiga doimiy ravishda e'tibor qaratib turgan. Zelenskiy dengizchilarga prezident soatlari sovg‘a qilgan.

Dengizchilar 2018 yil 25 noyabrda Kerch bo‘g‘ozida yuz bergan voqea oqibatida Rossiya kuchlari tomonidan asirga olingandi.