Европада ёзнинг асосий трансферлари. Кимга қандай баҳо?

Спорт 17:40 / 05.09.2019 9321

Европанинг «кучли бешлик» чемпионатларида иштирок этувчи жамоалар 2019 йилда трансферлар учун беш миллиард фунтга тенг маблағ сарфлашди. 

Англия премьер-лигаси клублари 1,41 миллиард фунт, Испания Ла лигаси клублари — 1,24 миллиард фунт сарфлашган. Шунингдек, бундеслига (670 миллион), А Серия (1,06 миллиард) ва Лига 1 (605 миллион) иштирокчилари ҳам янги трансфер рекордларини ўрнатишган. Барча чемпионатларда рекордлар янгиланган.

Қуйида ёзнинг асосий трансферлари ва улар қай даражада ишончни оқлагани ва улардан нималар кутилаётгани ҳақида келтирилади.

Испаниядаги топ трансферлар

Ёзнинг энг йирик трансферлари албатта Испания чемпионатига тўғри келди. Харидлар учун энг кўп пул сарфлаган клублар ҳам шу чемпионатнинг уч гранди - «Реал», «Барселона» ва «Атлетико» бўлди. Қуйида ушбу чемпионатдаги асосий трансферларга баҳо берилади.

ЖОАУ ФЕЛИШ (Бенфика – Атлетико) – 126 миллион евро

Албатта, Гризманн даражасига ҳали бор, лекин бу трансфер айнан франциялик ҳужумчи ўрнини босиш учун амалга оширилди. Фелиш «Бенфика»да худди шу услубда ҳаракат қилган – тўпсиз жуда яхши ҳаракатланади, креативлик ва самарадорлик мувозанати ҳам жойида.

Шундай бўлса-да, мадридликлар бироз кўпроқ тўлаб юборишди. Фелиш ёш, унда фақат бир йил юқори савиядаги тажриба бор, холос. Ҳимояланишда кучли эмас, буни Симеоненинг ўзи ҳам таъкидлади. Бошқа тарафдан, вазият осон эмасди, футболчига топ-харидорлар кўп эди. «Бенфика» эса «Атлетико»да етарлича пул борлигини билгани учун максимум суммани қўлга киритишга уринди. Бу вундеркинд мавсумолди йиғинларида ҳам ўзини кўрсатди, чемпионат ўйинларида ҳам барқарор ўйин кўрсатиб, уч ўйинда 1 гол уриб, бир голга пас берди.

КИРАН ТРИППЬЕР (Тоттенҳэм – Атлетико) – 22 миллион евро

Бир томондан жуда мантиқли ва бошқа томондан кутилмаган трансфер. Кутилмаган тарафи, асосан Лотин Америкаси вакилларига эътибор қаратиб келган Симеоненинг «Атлетико»сида англиялик футболчи. Ўйин томонидан эса, ҳаммаси тўғри – ўнг қанот ҳимояси муаммо эди. Ўтган мавсумда бу позицияда Арьяс ва Хуанфран тўп суришганди. Триппьер ҳимояланишда у қадар зўр эмас, лекин ҳужумларга қўшилиш, тўп узатиш бобида юқоридаги номлардан бир бош устун.

Лондонликларнинг 22 миллион евро эвазига инглиз паспортига эга бўлган асосий таркиб ўйинчисини бериб юбориши ҳам бироз тушунарсиз қарор. Бу ерда кўпроқ Кираннинг бошқа жамоада ўзини синаб кўриш истаги рол ўйнаган бўлиши эҳтимоли катта. У янги чемпионатда қанотдан голли паслар беришни бошлаб юборди.

АНТУАН ГРИЗМАНН (Атлетико – Барселона) – 120 миллион евро 

Бу трансфер кўпроқ Неймарнинг зарарига бўлди – франциялик футболчига сарфланган пуллар ёзнинг сўнгги кунида «Барселона»ни пулсиз қолдирди ва Неймар Парижда қолди. Аммо айтиш мумкинки, Вальверденинг вертикал футболи учун Гризманн мукаммал тарзда мос келади.

Антуан тўпни ўзида кўп ушлаб турмайди, чизиқлар орасида тўпни қабул қилиш, ҳимояни ёриб ўтувчи комбинацияларда жуда фойдали футболчи. У «Бетис»га қарши ўйинда жамоага йирик ҳисобда ғалаба келтирган бўлсада, «Атлетик» ва «Осасуна»га қарши ўйинларда йўқолиб қолди. Албатта, у ўзини «Атлетико»даги каби эркин ҳис қилмаслиги тайин, аммо биз уни ҳали ҳақиқий «Барселона» билан, яъни Месси таркибда бўлганида кўрмадик. 

ФРЕНКИ ДЕ ЙОНГ (Аякс – Барселона) – 75 миллион евро

Де Йонг, балки ўз даврининг энг иқтидорли футболчиларидан бири ва анчадан бери «Барселона»да ўйнашни орзу қилганди. Тўпни ҳужумга қадар етказиб беришда у ҳозир ҳам Европада тенгсиз, унинг бу хусусияти эса Мессини кўп ортга қайтишдан озод қилади. Умуман олганда, жуда ўринли трансфер.

Лекин айнан бугунги кундаги самараси борасида ҳали эрта. Де Йонг «Аякс»да 4-2-3-1 схемасида Ласса Шоне билан шерик эди. «Аякс» бош мураббийи Эрик тен Ҳааг Френки учун айнан шундай шерик кераклигини, у ҳақиқий «олтилик» сифатида ўйнашга мос эмаслигини айтганди. «Барселона»да эса уни Бускетсга узоқ йиллик ўринбосар сифатида кўришмоқда. Шунинг учун де Йонг ҳали кўп ўрганиши керак.

Шу томондан ва яна, Ракитичнинг жамоада қолганидан келиб чиқсак, бугунги кунда де Йонг учун энг мос позиция ҳали йўқ. Ҳатто Френки бугунги таркибдаги ўрнини Ракитичга ютқазиб қўйиши ҳам ҳеч гап эмас. Ҳаммаси Вальверденинг танловига боғлиқ – узоқ муддатли пойдеворми ёки бугунги натижами? Бу танлов ўйиндан ўйинга ўзгариб туриши табиий. 

ЭДЕН АЗАР (Челси – Реал) – 100 миллион евро

Роналдунинг кетиши «Реал»ни сўнгги ўн йилликдаги ўзига хос услубидан ва етакчисидан айирганди. Негадир клубда Роналду кетмагандек ёки унинг кетиши ўйинга умуман таъсир этмайдигандек тутишди ва оқибати ўтган мавсумда нима бўлганини кўрдик.

Эден Азар айнан шу мақсадда, асосий куч сифатида олиб келинди. Бу ерда трансфер қиймати, бу ўтиш Азар учун нима бериши ҳақидаги ҳар қандай гаплар ортиқча. Айтиш мумкинки, аҳамият жиҳатидан Европанинг энг катта трансфери айнан шу бўлди. Аммо у мавсум бошланмасдан жароҳат олиб, жароҳатлар синдроми туфайли қийин аҳволда бўлган жамоасини яна қийин аҳволда қолдирди.

ЛУКА ЙОВИЧ (Айнтрахт – Реал) – 60 миллион евро.

«Мадрид» жарима майдони ичида жуда яхши ҳаракат қиладиган ва вазиятлардан фойдаланишда беназир бўлган ҳужумчини қўлга киритди. «Реал» айнан шу жабҳада муаммоларга эга эди, Йович эса ўзининг ажойи реализация билан Европанинг эътиборини қозонди.

Худди де Йонг билан «Барселона»да бўлгани сингари, мураббийга бирданига Йовичдан фойдаланишда муаммолар юзага келади. Биринчи вариант, Бенземанинг ўрнига тушириш, лекин Зидан франциялик ҳужумчини жуда юқори баҳолайди. Иккинчи вариант, икки ҳужумчи схемасида ҳаракат қилиш, аммо бу Эден Азарни севимли позициясидан маҳрум қилади ёки ярим ҳимояни кучсизлантиради.   

ФЕРЛАН МЕНДИ (Лион – Реал) – 48 миллион евро 

Ўтган мавсумда чап қанот ҳимояси «Реал» учун энг оғриқли нуқта эди. Марсело кўп жароҳат олди ва нуқул Солари билан жанжаллашди, натижада Регилонга рақобатни бой берди. Тўғри, Зиданнинг келиши Марсело яна спорт формасига қайтишига сабаб бўлди, лекин тушуниш мумкинки, энди ишонч сўнган. «Реал»да бу позицияда ягона номзод сифатида Марсело қолишини исташмаяпти. 

Рақобат ё Марселони энг яхши савияга қайтишига ёрдам беради ёки асосий таркибда унинг ўрнига ёш, узоқ муддатли ўринбосар пайдо бўлади. Менди топ-клубда ўйнай оладиган салоҳиятга эга, фақат бу қачон амалга ошиши Марселога боғлиқ.

НАБИЛ ФЕКИР (Лион – Бетис) – 19.75 миллион евро

«Бетис»да Фекир трансферини ўша биз билган Денилсондан кейинги буюк келишув сифатида баҳолашмоқда. Футболчининг ва клубнинг мақомидан келиб чиқсак, ёзнинг энг ҳайратланарли трансферларидан бири бўлди дейиш мумкин.

Нарх нуқтаи назаридан тушунарли, футболчининг шартномаси тугашига бир йил қолганидан келиб чиқиб, «Лион» 30 миллион евро сўраганди ва турли бонуслар билан шу суммани қўлга киритиши мумкин. «Бетис» ҳам Европа ўлчовларидаги таниқли ном учун катта пул сарфламади. 

Фекир учун эса, номаълум, ўз лигасида етакчилардан бири бўлган ва ҳужумкор жамоадан оддий ўртамиёнага ўтмоқда. Ўзини кўрсатиб, топ даражадаги клубга бўлган йўл нуқтаи назаридан, «Лион» истиқболлироқ эди, «Бетис» бу нарсани бермаслиги мумкин. Тўғри, футболчининг қайталаниши мумкин бўлган жароҳати ҳақида ҳамма гапирди, бу жуда муҳим фактор, лекин нима бўлгандаям, Фекир учун бу трансфер пасайиш сифатида баҳоланса керак.


Англиядаги топ трансферлар

Англияда ҳам ҳар сафаргидек ёзги трансферлар қизғин кечди. «МЮ», «Арсенал», «Сити» ва «Тоттенҳэм» энг кўп пул сарфлаган жамоалар бўлишди.

ҲАРРИ МАГУАЙР (Лестер – Манчестер Юнайтед) – 87 миллион евро.

«Челси»га қарши ўйиндаги ажойиб дебют ҳимоячи учун жуда яхши истиқболни намойиш қилганди, аммо барибир, бироз хавотир бор. Аввало, барча топ-клублар каби, юқори чизиқда ҳимояланишда Магуайрда муаммолар пайдо бўлиши мумкин. Бунинг устига жамоа ёш экани ва ўзаро тушунишлар даражаси маромига етмагани учун сарфланган сумма бирданига оқланишига ишониш қийин. Шу нуқтаи назардан, Виржийл ван Дейкнинг хариди янада аниқроқ бўлганди – у анча тайёр жамоага етишмаётган қисм сифатида сотиб олинганди. Манчестерда эса, барча чизиқларда жамоа энди шаклланмоқда.

Бу келишувда кўпроқ «Лестер» ютди, дейиш мумкин. Клуб энг бошида қўйилган нархда қатъий турди ва якунда ўша пулни олди. Трансфер қийматини тушириш ниятида вақтни имкон қадар кечиктирган «Манчестер Юнайтед» эса, барибир барча шартларга кўнган ҳолда, футболчини Каррингтондаги мавсумолди йиғинларисиз қолдирди.

НИКОЛЯ ПЕПЕ (Лилл – Арсенал) – 80 миллион евро

Узоқ вақт Уилфрид Заага «ошиқ бўлган» «Арсенал» бирданига эътиборини Николя Пепега бурди ва бироз қимматроққа, лекин анча кучлироқ, универсалроқ футболчини қўлга киритди. Лондонликлар томонидан айтиш мумкинки, яхшигина пулни Пепега сарфлаган клуб, натижада ҳимояни кучайтира олмади. Албатта, бу ҳолатда Пепенинг айби йўқ ва ҳужумчи кўп жиҳатдан Эмери жамоасига мос келади.

Пепе учун хавотирли жиҳат шундаки, у унчалик ҳужумкор бўлмаган мураббий қўл остига келди ва шунингдек, бу жамоада Обамеянг ва Ляказетт бор. Ҳимояга путур етказмасдан туриб, ҳар уч футболчини таркибга жойлаштириш анча дадиллик талаб қилади. Пепе мавсумни жуда яхши бошлаган бўлса-да, умуман, жамоа учун энг керакли мурват эканига ишонч ҳосил қилиш учун яна тер тўкишга тўғри келади.

ЖОАУ КАНСЕЛУ (Ювентус – Манчестер Сити) – 30 миллион евро + Данило

Канселу Гвардиола учун муҳим тактик қуролдир. Энди «Сити»да ҳар икки қанот ҳимоячилари ҳужумкор бўла оладиган режим ҳам бор. Уокерни ҳужумкор дея олмаймиз ва кўпинча, у ҳужумга учинчи марказий ҳимоячи сифатида қўшиларди. Канселу ҳатто вингер сифатида ҳам яхшигина тажрибага эга ва худди Бенжамен Менди каби бутун қанот бўйлаб ўйнай олади.

«Ювентус» учун ҳам бу трансфер жуда ўринли. Маурисио Саррида асосан ўнг қанот ҳимоячилари чапдан кўра ҳимоявийроқ бўлишади. Хюсай ёки Аспиликуэтани мисол келтириш мумкин. Балки шунинг учун Сарри бошидан Канселуни сотишни ўйлаган. Ҳимоявийроқ ўнг қанот тизимига ҳатто Маттиа де Шильо кўпроқ мос келади. Клуб ҳам пул олди ва бу талаб учун мосроқ бўлган Данилони ҳам қўлга киритди.

ЖОВАННИ ЛО ЧЕЛЬСО (Бетис – Тоттенҳэм) – 15 миллион евро ижара + кейинчалик 40 миллион еврога сотиб олиш опцияси

Леви жуда яхши келишувни амалга оширди – Ло Чельсо учун тўланадиган трансфер суммаси келаси йилга қолдирилди, яъни бир йил футболчи ижара асосида тўп суради. Агар ҳаммаси ўхшаб қолса, клуб у қадар катта бўлмаган пулга Кристиан Эриксенга ўринбосар топган бўлади.

«Бетис» учун ҳам бу яхши пул, аммо Ло Чельсо учун адаптация кутилганидан қийинроқ бўлиши мумкин. Айниқса, Эриксен таркибда қолгани бу жараённи янада секинлаштиради – Жованни майдонда кўпроқ вақт бўлиши учун анча тер тўкиши лозим. Илк кунларда, ҳозирча Почеттино унинг спорт формасидан кўнгли тўлмаётганини айтмоқда. Албатта, Ло Чельсо Почеттино қўл остида ўйнаб кетади, аммо бунинг учун вақт керак.

РОДРИ (Атлетико – Манчестер Сити) – 70 миллион евро

Родри – илк йилларданоқ Гвардиола орзу қилган типдаги таянч яримҳимоячиси. Фернандиньо майдонда ўз вазифаларини яхши бажармоқда, ҳатто ўттиздан ошган бўлса-да, ўсишга эришди. Лекин айнан Родри системанинг муҳим калити бўлиши мумкин – уни янги Бускетс деб аташмоқда. 

Айниқса, Фернандиньонинг жароҳатидан сўнг, айнан шу позицияни тўлдириш жуда муҳим саналаётганди. Ёш футболчининг жалб этилиши жамоадаги ҳар томонлама мувозанатни таъминлади, дейиш мумкин. «Атлетико» футболчи учун яхши пул олган бўлса-да, ўтган мавсумдаги энг барқарор ва муҳим фигурасини йўқотди.

ТАНГИ НДОМБЕЛЕ (Лион – Тоттенҳэм) – 60 миллион евро 

Муса Дембеленинг кетиши «Тоттенҳэм»да чизиқларни боғлаш ва сифатли прессинг уюштиришда муаммолар келтириб чиқарди. Бунга жавобан Маурисио ўйин услубини бироз ўзгартирган ва янада вертикал ўйнашга ҳаракат қилди. Аммо майдон марказига доимий равишда жавоб бера оладиган ном йўқ эди.

Ндомбеле кўп жиҳатдан Дембелега ўхшаб кетади. Айниқса, рақиб босимида ўзини яхши ҳис қилади, кўпчиликни ўзига тортган ҳолда, тўпни йўқотмайди ва шерикларига бўш зоналарни очиб беради. Айтиш мумкинки, Ндомбеленинг келиши «Тоттенҳэм» ўйинини янада кучайтиради ва Почеттино яна эски, ҳужумкор услубига қайтади. 

ААРОН ВАН-БИССАКА (Кристал Пэлас – Манчестер Юнайтед) 

Сўнгги ойларда кўпчилик Аарон Ван-Биссаканинг ўзига хос портретини чизишди: ҳимояда ўтиб бўлмас қўрғон, лекин ҳужумларга кўп қўшилмайди. Бу таърифнинг акси бўлган Люк Шоу билан билан шерикликда футболчи Сульшер учун айни муддаодек кўринганди.

Аммо аслида бу ҳақиқатдан узоқроқ, Ван-Биссака ҳужумкор ўйнай олади, ҳатто у ёшлар жамоаларида вингер сифатида ҳаракат қилган, шунчаки, «Кристал Пэлас»да бу рол Ван Анҳолтга берилгани учун Аарон кўпроқ ҳимояга жавобгар эди. Манчестердаги илк ўйинлар ҳам буни исботлади, Аарон етарлича ҳужумлар ташкил қилишда қатнашмоқда. Аммо бу баъзи вазиятларда позицияни йўқотиб қўйишга ҳам олиб келяпти. Яхши тезликка ва жисмоний кўрсаткичларга эга бўлган ҳимоячига нисбатан эътироз йўқ.

Умуман, натижа нуқтаи назаридан «Манчестер Юнайтед» ҳамон муаммолар гирдобида бўлса-да, Магуайр ва Ван-Биссаканинг келиши ҳимоядаги ўйинни анча тартибга солинди дейиш мумкин. Масалан, тўрт турдан сўнг, АПЛда ўз дарвозасига энг кам вазият яратишга қўйиб берган жамоа «Юнайтед» бўлиб турибди.


Италиядаги топ трансферлар

А Серияга ҳам ёзги трансферларда бир қатор юлдузлар келиб қўшилди. «Интер» ва «Ювентус» ҳаммадан фаол.

РОМЕЛУ ЛУКАКУ (Манчестер Юнайтед – Интер) – 65 миллион евро

Конте «Челси»да ишлаганида ҳам Лукакуни жамоага қайтаришга жиддий ҳаракат қилганди, демак мураббий системаси учун жуда мос футболчи олиб келинди. Мураббий трансфер нархи қониқарли бўлганини айтмоқда, Лукаку эса, унга жавобан ортиқча вазнни йўқотди, гол уришни бошлади ва муҳитни ўзгартириш зарур бўлганини айтмоқда.

«МЮ» икки йил олдин «Эвертон»га тўлаганидан камроқ пулга эга бўлди. Сульшер якунда марказий ҳимоячи амплуасида тажрибага эга бўлмаган Рэшфорд ва Марсиял билан қолаётган бўлса-да, бу трансферга қарши бўлмади. Инглизлар учун бу ишонч қандай якун топиши ҳозирча номаълум. Бельгиялик футболчи эса Италияда ишончни оқлашни бошлади – 2 ўйин ва 2 гол.

АЛЕКСИС САНЧЕС (Манчестер Юнайтед – Интер) – ижара

Алексис Санчес кўп йиллар ўтиб яна Италияга қайтди. Айтиш мумкинки, у Англияга киришиб кета олмади, ҳатто «Арсенал»да ҳам Санчес кўп вазиятларни индивидуал маҳорати эвазига ҳал қилган, жамоа ўйинига киришиб кетишда муаммолар бўлиб, жамоа муҳитига салбий таъсир кўрсатган. «МЮ»да ундан ёмонроқ, майдонда ҳам муаммоларга дуч келди.

Чили таркибидаги ўйинлар кўрсатмоқдаки, агар қулай шартлар бўлса, Алексис ҳали ҳам ёмон эмас. Бу томондан Италияда унда муаммо кам бўлади. Конте бундай ўйинчиларга майдонга жой топиб беришга уста. Эсингизда бўлса, жуда тартибли ва ҳимоявий «Челси»да ҳам у Азарга эркинлик бера олганди. Санчес ҳам худди шундай қурол бўлиши мумкин.

Санчеснинг маошининг қарийб ярми манчестерликлар томонидан тўланади. Инглизларнинг бунга рози бўлишганига ягона сабаб – «Интер»да сотиб олиш опцияси мавжуд эмас. Демак, агар Санчес Италияда ўйнаб кетса, «МЮ» трансфердан ютиши мумкин. Манчестерда туриб, унинг нархи ошмаслигини ҳамма билиб турганди.

МАТТЕЙС ДЕ ЛИГТ (Аякс – Ювентус) – 85,5 миллион евро

Де Лигт – Европанинг энг умидли ва универсал ҳимоячиларидан бири. У яккакурашларда ҳам, позицион ҳужумларда ҳам фойдали футболчи. Де Лигтсиз ҳам «Ювентус»да жуда яхши марказий ҳимоячилар бор эди, шунчаки, туринликлар бу трансфер орқали, клубнинг трансфер бозорида рақобатбардош эканини ҳам кўрсатиб қўйишди. Ахир футболчи учун деярли барча топ-клублар курашаётганди.

Роналдунинг трансферида бундай омил бўлмаган, айнан де Лигтнинг катта рақобат остида қўлга киритилиши «Ювентус»нинг буюклик рамзи бўлиб қолади.

ААРОН РЭМЗИ (Арсенал – Ювентус) – эркин агент. 

Френк Лемпард усулида ярим ҳимоядан жарима майдонига киришда тенгсиз футболчилардан бири. Бу эса, Роналдуга қўшимча қулайлик туғдиради, ҳимоячилар энди ҳужумчини кўздан қочиришлари мумкин. Рэмзи яхшигина маош эвазига ўтган бўлса-да, «Ювентус»га керакли футболчи эди.

«Арсенал» учун бу хато. Рэмзи бошида Эмерининг режаларига кирмади ва Турин клуби билан келишиб қўйди. Баҳорга бориб, у жамоанинг жуда муҳим футболчиларидан бирига айланганда эса, поезд кетиб бўлганди.

АДРИЕН РАБЬО (ПСЖ – Ювентус) – эркин агент

Рабьонинг ўтиши бироз тушунарсиз. Бу худди «Ювентус» савияли эркин агентларни йиғиб олиш одатидан воз кечмаганини кўрсатаётгандек. Табиийки, Рабьо ҳам жамоа учун жуда фойдали бўлиши мумкин, аммо айнан ҳозир у учун жамоада аниқ ролни кўриш қийинчилик туғдиради. «ПСЖ» эса, энг муаммоли футболчидан қутулди. Ҳа, унинг олдида ҳатто Неймарнинг қилиқлари ҳам ҳеч нарса эмасди.

Трансфер қиймати бўлмагани туфайли, Рабьонинг шартномаси анча баланд – футболчи маош бўйича Лигада учинчи ўринни банд этган.

ДИЕГО ГОДИН (Атлетико – Интер) – эркин агент 

«Атлетико» Диего Симеоне давридаги энг яхши ҳимоячисини йўқотди. Ҳатто шу ёшда ҳам Годин асосий таркибда фойдали бўлиши мумкин эди. Симеоненинг услуби Годиннинг энг яхши хислатларини (яккакурашлар, жарима майдонидаги ўйин, вазиятни баҳолаш) юзага чиқарган бўлса, камчиликларини (юқори ҳимояланиш, биринчи пас) яширар эди.

Годинни Контенинг «Интер»ида кузатиш қизиқ, аммо баъзи ҳадиклар бор. Биринчидан, энди унинг камчиликлари олдингидек яширилмаслиги шубҳасиз. Иккинчидан, «Интер» уч ҳимоячили схемада ўйнамоқчи, Годин эса, бунга ўрганмаган. 33 ёшли футболчи мослаша олармикин?

КОСТАС МАНОЛАС (Рома – Наполи) – 36 миллион евро 

Манолас қайсидир маънода Албиолга ўринбосар бўлади. У Анчелотти услубига кўпроқ мос келади, ҳатто. Умуман, бу трансфер «Наполи»нинг Сарри услубидан Анчелоттига ўтишини ажойиб тарзда ифодалайди. Албиол ўрнига Манолас келмоқда, шунингдек, Сарри даврида яхши ўйин кўрсатиб, Карлога тўғри келмаган Амаду Диавара «Рома»га ўтиб кетяпти.

Бу келишувда «Рома» ҳам ютяпти. Яхшигина пул билан бир қаторда, янги мураббий – Пауло Фонсека услубига мос бўлмаган ҳимоячи ўрнига, бошқа, мосроқ футболчи келмоқда.


Германиядаги топ трансферлар

Бундеслигада асосан ички трансферлар рўй берди. Лекин бу сафар асосий харидор «Бавария» эмас, «Боруссия» бўлди. Мюнхенликлар эса асосий трансферларни хориждан амалга оширди. Қуйида Германиядаги ёзги трансферларнинг асосийлари ҳақида.

ФИЛИППЕ КОУТИНЬО (Барселона – Бавария) – 8,5 миллион евро ижара ҳақи

«Бавария» Коутиньони сотиб олишга мажбур эмас, «Барселона» ҳам футболчи учун маош тўлаб юрмайди. Ҳамма хурсанд.

Коутиньо ўзи каби футболчига муҳтож бўлган топ клубда навбатдаги имкониятга эга бўлади. Ўтган йили бу функцияни Хамес Родригес бажариши керак бўлганди. Коутиньода бунинг учун яхши имконият бор, аммо Хамес даражасида ёрдам бера оладими, бу масала ҳали очиқ қолмоқда. Чунки бразилиялик футболчи кўпроқ индивидуал маҳорат соҳиби, унинг кетиши «Ливерпуль»да айнан жамоавий футболни кучайтирганди. 

ЛЮКА ЭРНАНДЕС (Атлетико – Бавария) – 80 миллион евро

Жароҳати бор футболчи учун рекорд даражада пул тўлаган «Бавария» яхшигина риск қиляпти. Эрнандес жуда катта салоҳиятга эга, марказий ҳимояда ҳам, чап қанотда ҳам ўйнай олади, аммо унинг фаолиятида ҳали бирор тўлиқ мавсум йўқ. Рақобат ва жароҳатлар туфайли.

Люканинг ҳужумларга қўшилиши ҳам ўта юқори эмас. 80 миллион евро эса, ранг-баранг қобилиятларга эга бўлган футболчиларга тўланади. Тўғри, «Атлетико» келажакда жуда фойдали бўлиши мумкин бўлган футболчидан айрилди, аммо «Бавария» тўлаган нарх ҳам керагидан ортиқ.


БЕНЖАМЕН ПАВАР (Штутгарт – Бавария) – 35 миллион евро

Кўп жиҳатдан Эрнандесга ўхшаб кетади. У ҳам марказий ҳимояни, ҳам ўнг қанотни ёпа олади. У ҳам жаҳон чемпионатида Франция таркибида ҳаракат қилган, шунингдек, худди Эрнандес каби, асосан ҳимояда фойдали, ҳужумга кам қўшилади.

Фарқ шундаки, Павар аллақачон Германияда уч йил тажриба тўплаб улгурган ва трансфер қиймати ҳам анча паст. «Штутгарт» учун ҳам фойдали нарх – инглиз клубларининг Бундеслига бозорига кириб келиши «Бавария»нинг ишини анча қийинлаштирди, энди мюнхенликлар лига юлдузларини осонлик билан қўлга кирита олишмаяпти.

МАТС ҲУММЕЛС (Бавария – Боруссия Д) – 30,5 миллион евро 

«Бавария» ўзининг асосий рақобатчисига асосий ҳимоячисини беришга мажбур бўлди. Ҳуммелс ҳар томонлама бугунги дортмундлик ҳимоячилардан анча кучли, бунинг устига етакчилик хусусиятига эга. Ҳуммелснинг Дортмунд клуби билан яхши таниш экани ҳам қўшимча бонус сифатида хизмат қилади.

ТОРГАН АЗАР ( Боруссия М – Боруссия Д) – 25,5 миллион евро

Азар сўнгги мавсумларда Бундеслиганинг энг яхши ва барқарор ҳужумкор ярим ҳимоячиларидан биридир. Баъзи хислатлари билан акаси Эден Азарни ёдга солса-да, у масалан, чап қанотга боғланмаган, ўнг қанотда ҳам фойдали бўла олади. Дортмундда у айнан чап қанотдаги позиция учун рақобат қилса керак, чунки ўнг қанот Жейдон Санчо томонидан банд қилинган.

Торган аллақачон ўсишга тайёр бўлган, аммо Люсен Фаврнинг бироз прагматик услубидан жабр чекиши ҳам мумкин. «Боруссия» ҳозир Клопп ёки Тухел давридагидек, ўйинларда устунлик намойиш қилмаяпти. Дортмундда ҳозир жуда кўп ҳужумкор футболчилар – Гётце, Ройс, Санчо, Брандт, Азарлар уч позиция учун кураш олиб боришади. Уларга бир вақтда майдонга жой топиб бериш учун Гвардиола бўлиш керак, Фавр эмас. Айнан шу сабаб билан Кристиан Пулишич таркибдан четда қолганди. Энг яхши вариантда Азар жамоанинг муҳим бўлаги бўлиб қолади, бу амалга ошмаган тақдирда ҳам, бу трансфер Дортмунд таркибини кучайтирди, шубҳасиз.

ЮЛИАН БРАНДТ (Байер – Боруссия Д) – 25 миллион евро

«Байер»га Петер Бос келгач, Брандт ярим ҳимоя марказидан жой олди ва иккинчи даврада энг яхшилардан бири бўлди. «Боруссия» футболчининг шартномасида кўрсатилган маблағни тўлади ва уни қўлга киритди. Чемпионлар Лигаси олдидан «Байер» учун катта йўқотиш.

Брандт Торган Азарга нисбатан кучлироқ ва универсалроқ, шунинг учун Фаврнинг ҳар қандай схемасидан жой топа олса керак. Дортмундликлар учун ажойиб трансфер. 

Кўпроқ янгиликлар