Nyu-Yorkning Uoll-Stritida O‘zbekiston bayrog‘i ko‘tarildi

Nyu-Yorkning mashhur ko‘chalaridan biri – Uoll-Stritda O‘zbekiston bayrog‘ining ko‘tarilishi tantanali marosimi bo‘lib o‘tdi. Bu haqda “Dunyo” axborot agentligi xabar berdi. 

Ushbu tadbir Turkiston-Amerika assotsiatsiyasi va “Vatandosh” tomonidan tashkillashtirildi.

Tadbirda AQShda yashovchi o‘zbeklar, ijtimoiy-siyosiy doiralar vakillari, OAV hamda shahar aholisi va mehmonlari ishtirok etishdi. 

Ko‘pchilik mehmonlar o‘zbek milliy kiyimlarida bo‘lganlar. Bayroqning ko‘tarilishi O‘zbekiston madhiyasi bilan kechgan. Bayroq 15 metrlik flagshtokka o‘rnatilgan. U bir hafta davomida hilpirab turadi.

Tantana davomida o‘zbek diasporasining ijodiy guruhlari va musiqiy jamoalari ishtirokida madaniy-ko‘ngilochar tadbirlar, O‘zbekiston haqida foto va videomateriallar namoyishi, o‘zbek taomlari taqdimoti bo‘lib o‘tgan.