2018 yil 22 sentabr kuni Kun.uz internet nashrida Zafarbek Solijonov muallifligida «Davlat test markazi sudda yutqazdi. Endi abituriyent talaba bo‘la oladimi?» sarlavhali maqola e'lon qilingan edi.
Ushbu maqola Namangan viloyati, Yangiqo‘rg‘on tumanida istiqomat qiluvchi Muxlisa Axmadullayevaning Namangan Davlat universiteti «Xorijiy til va adabiyoti: ingliz tili yo‘nalishi»ga o‘tkazilgan imtihonlar natijalaridan norozi bo‘lib yo‘llagan murojaatiga asosan o‘tkazilgan jurnalistik tekshiruvi yakunlariga ko‘ra nashr qilingan edi.
Maqolada arizachining Davlat test markazi xatti-harakatlarini g‘ayriqonuniy deb topish to‘g‘risidagi shikoyati Sergeli tuman ma'muriy sudining 2018 yilning 19 iyuldagi hal qiluv qarori bilan qanoatlantirilgani, Davlat test markazi tomonidan taqdim qilingan savollar kitobi va javoblar varaqasi haqiqiy emas deb topilgani hamda Davlat test markazi zimmasiga shikoyatni qayta ko‘rib chiqish majburiyati yuklatilgani haqida so‘z yuritilgan.
Maqola e'lon qilingandan so‘ng mazkur masala tegishli tergov organi tomonidan o‘rganib chiqilib, tergov va surishtiruv harakatlari natijasida abituriyent Axmadullayeva Muxlisaga tegishli test materiallari soxtalashtirilmagani, test materiallaridagi yozuvlar aynan M.Axmadullayeva tomonidan bajarilgani aniqlangan.
Bundan tashqari, yuqori turuvchi sud instansiyasi tomonidan Sergeli tuman ma'muriy sudining 2018 yilning 19 iyuldagi hal qiluv qarori bekor qilinib, ma'muriy ish yangidan ko‘rilishi uchun tuman ma'muriy sudiga qaytarilgan. M.Axmadullayeva sud tomonidan tegishli tartibda ogohlantirilishiga qaramasdan sud majlisiga kelmagan. Arizachi M.Axmadullayeva sud majlisiga kelib o‘z arizasini quvvatlamagani sababli ma'muriy ishni ko‘rish tugatilgan.
Ushbu holatdan ko‘rinadiki, M.Axmadullayevaning unga tegishli test materiallarining soxtalashtirilgani, test materiallaridagi yozuvlar u tomonidan bajarilmagani haqidagi vajlari asossiz ekani aniqlangan.
Shunga ko‘ra, kun.uz sahifasidagi M.Axmadullayevaning murojaati bo‘yicha chiqarilgan maqola, jiddiy jurnalistik tekshiruv amalga oshirilmasdan, holat atroflicha o‘rganilmasdan, ushbu masala bo‘yicha Davlat test markazining fikr-mulohazalari tinglanmasdan e'lon qilinganini inobatga olib, tahririyat Davlat test markazi rahbariyati va jamoasidan rasman uzr so‘raydi.
Kun.uz sayti Davlat test markazi bilan muntazam hamkorlikka umid bildirib qoladi.
