Cyber university davlat universitetiga rektor tayinlandi

Shuhrat Qayumov Cyber university davlat universiteti rektori etib tayinlandi. Mazkur oliygoh prezident qarori bilan yanvar oyida tashkil etilgan.

Foto: Raqamli texnologiyalar vazirligi

Vazirlar Mahkamasi qarori bilan Shuhrat Qayumov Cyber university davlat universiteti rektori etib tayinlandi. Bu haqda Raqamli texnologiyalar vazirligi xabar berdi.

Shuhrat Qayumov 1975 yilda Samarqand viloyatida tug‘ilgan. Ma’lumoti oliy, Toshkent davlat texnika universitetini va 2008 yilda Yaponiyaning siyosiy tadqiqotlar institutini tamomlagan.

Faoliyati davrida Vazirlar Mahkamasi axborot tizimlari va telekommunikatsiyalar masalalari axborot-tahlil departamentida, Toshkent axborot texnologiyalari universitetida turli lavozimlarda ishlagan. Shuningdek, u oliy va o‘rta ta’lim vaziri o‘rinbosari, O‘zbekiston davlat jahon tillari universiteti rektori lavozimlarida ham faoliyat yuritgan.

Eslatib o‘tamiz, O‘zbekistonda Cyber university davlat universiteti tashkil etilishi to‘g‘risida yanvar oxirlarida xabar berilgandi. Mazkur oliygoh kiberxavfsizlik, raqamli texnologiyalar, raqamli iqtisodiyot, sun’iy intellektga asoslangan avtomatlashtirilgan axborot-tahliliy tizimlarni yaratish, robototexnika va boshqa turdosh sohalar bo‘yicha kadrlar tayyorlash bilan shug‘ullanadi.

#Shuhrat Qayumov #Cyber university