O‘zbekiston Respublikasi Soliq kodeksining yangi tahrirdagi loyihasi tayyorlangan va u jamoatchilik muhokamasiga qo‘yilishi kutilmoqda. Kodeks loyihasi belgilangan tartibda  qabul qilinib, tasdiqlansa, u 2020 yil 1 yanvardan kuchga kirishi nazarda tutilgan, deydi Davlat soliq qo‘mitasi boshqarma boshlig‘i o‘rinbosari Aziz Umirzoqov.

«Kuzgacha, aniqrog‘i shu yoz oylarida yangi tahrirdagi kodeks loyihasi jamoatchilik muhokamasiga qo‘yiladi. Unda qishloq xo‘jaligi soha vakillarini ham QQSga tortish masalasi ko‘rib chiqilgan, bu masala aynan qanday yechim topishi bo‘yicha yakdil qaror yo‘q, ammo tashabbus ko‘rsatilgan», — deydi u.

Eslatib o‘tamiz, soliq siyosatini rivojlantirish bo‘yicha konsepsiya 2018 yil iyunda qabul qilingandi va yangi tahrirdagi Soliq kodeksi 2019 yil 1 yanvardan boshlab kuchga kirishi ta'kidlangandi.