Чимкент-Тошкент-Хўжанд иқтисодий коридорининг яратилиши минтақавий динамизмни кенгайтиради

Иқтисодиёт 16:17 / 31.05.2019 3179

Чимкент-Тошкент-Хўжанд шаҳарлари ва уларга туташ ҳудудлар ўртасида янги иқтисодий коридорни яратиш ташаббуси минтақавий динамизмни кенгайтириши ва Марказий Осиёдаги иқтисодий интеграцияга янада кучли туртки бериши кутилмоқда. Осиё тараққиёт банки (ОТБ) бошчилигида ўтган Марказий Осиё минтақавий иқтисодий ҳамкорлик (МОМИҲ) дастурига бағишланган семинарда шу ҳақида хабар берилди. 

Kun.uz мухбирининг хабар беришича, Чимкент-Тошкент-Хўжанд шаҳарлари ва уларга туташ Туркистон, Тошкент ва Сўғд вилоятлари МОМИҲ дастури доирасида салоҳиятли иқтисодий коридор сифатида кўрилади. Уч шаҳар ва уларга туташ ҳудудлар бир-бирига яқин жойлашган ҳамда уларда нисбатан кўп сонли аҳоли яшайди - Марказий Осиё аҳолисининг тахминан 15 фоизи Туркистон, Тошкент ва Сўғд вилоятларида истиқомат қилади. 

Улар шунингдек халқаро бозорлар билан ҳам стратегик боғланган. Чимкент Европа-Шарқий Осиё ва Россия Федерацияси-Яқин Шарқ ва Жанубий Осиё халқаро чорраҳасида жойлашган, Тошкент ва Хўжанд эса туристик марказлар ҳисобланади. Уч шаҳар ва уларга яқин ҳудудлар иқтисодий томондан, айниқса, қишлоқ хўжалиги ва саноат соҳасида бир-бирини ўзаро тўлдириб туради.

Шунингдек уларнинг орасида ишчи кучнинг енгил трансчегаравий мобиллиги кузатилади, бунга уч мамлакат ўртасидаги тарихий, маданий, этник алоқалар ва тилларнинг яқинлиги сабабдир. 

Сўнгги ҳодисалар ҳам иқтисодий коридорни ривожлантириш учун қўшимча импульс сифатида хизмат қилмоқда. 

Биринчидан, 2018 йилда Чимкент Нур-Султон ва Олмаота билан бир қаторда республикадаги энг аҳамиятли шаҳарлардан бири сифатида тан олинди. Янги мақом ҳамда ҳукуматнинг мавжуд соҳа ва стратегиялари Жануби-Қозоғистон минтақасининг ривожи учун янги истиқболларни очиши кутилмоқда.

Иккинчидан, Ўзбекистон ҳукумати ислоҳотлар орқали бизнес-муҳитни яхшилашга жуда катта куч сарфламоқда. Туризм республика ривожланишидаги устувор йўналишлардан бири сифатида эътироф этилди. 

Учинчидан, уч давлат ҳукумати ҳам минтақавий иқтисодий ҳамкорликни кенгайтиришга доир биргаликдаги саъй-ҳаракатларни амалга оширишда турли даражадаги кучли сиёсий иродасини намойиш этди. 

Минтақавий иқтисодий коридорни ривожлантириш МОМИҲ ҳудудида тобора долзарблашиб бормоқда. Бунда иқтисодиётни тиклаш, Ўзбекистоннинг очиқлиги ва қўшни мамлакатлар, хусусан, Қозоғистон ва Тожикистон билан  алоқаларнинг мустаҳкамланиши минтақавий иқтисодий коридорлар ривожига янгича нафас бағишлайди. 

"МОМИҲ 2030" 2017 йилнинг октябрида Душанбе шаҳрида қабул қилинган узоқ муддатли янги стратегия бўлиб, унда иқтисодий коридорни ривожлантиришга катта аҳамият берилади. 

Ўзбекистон, ўз ўрнида, трансчегаравий иқтисодий коридор ривожланиши натижасида инфратузилма боғлиқлигини янада кўпроқ яхшилаши, Марказий Осиёнинг бошқа мамлакатлари, Россия ва Хитой билан боғланиши, қолган ҳудудлар билан иқтисодий интеграцияни яхшилаши мумкин.

Таъкидлаш жоизки, ОТБнинг янги лойиҳаси Қозоғистон, Ўзбекистон ва Тожикистон ўртасидаги иқтисодий коридорни ривожлантириш салоҳиятини баҳолашга йўналтирилган. Лойиҳа уч йилга мўлжалланган ва МОМИҲга аъзо мамлакатларнинг бизнес ҳамда бандликни ошириш учун шароит яратишда янги салоҳиятли иқтисодий коридорни ривожлантириш имкониятларини ўрганиш сўровига жавобан ишлаб чиқилган. 

Кўпроқ янгиликлар