Namangan shahar markazida Damas rusumli avtomashinalar harakatlanishi cheklanmoqda, deb xabar beradi viloyat YHXB matbuot xizmati vakili. Bu orqali shahar markazida paydo bo‘layotgan yo‘l tirbandligiga qarshi kurash boshlangan.

Ma'lum qilinishicha, Namangan viloyati hokimining 2017 yil 16 martdagi 98F-sonli hamda 2017 yil 7 avgustdagi 275f-sonli farmoyishiga asosan 101, 102, 103, 104, 105 maxsus transport vositalaridan tashqari Damas rusumli avtomashinalarning Namangan shahri hududida harakatlanishi ayrim yo‘nalishlarda cheklanadi.

Xususan, Islom Karimov va Mustaqillik ko‘chalari kesishmalari, Fazo chorrahasi, Otchopar chorrahasi, Islom Karimov va Jaloliddin Manguberdi ko‘chalari kesishmasi, avtovokzal chorrahasi, Amir Temur va G‘irvonsoy ko‘chalari kesishmasi, Taksopark chorrahasi, Alisher Navoiy ko‘chasidagi aylanma harakat Shodlik savdo markazi oldidan, Alisher Navoiy ko‘chasidagi aylanma harakat To‘raqo‘rg‘on ko‘chasi boshidan va boshqa bir qanchalar ko‘chalardan Damas rusumli mashinada kirish cheklanadi.

«Mazkur hududlardan Damas rusumli avtomashinalarning harakatlanishi cheklangani munosabat bilan YPX xodimlari, davlat soliq inspeksiyasi, «O‘zavtotrans» vakillari, mahalliy kengash deputatlari hamda jamoatchilik vakillaridan iborat ishchi guruh tuzilgan», — deydi tashkilot matbuot kotibi.

Garchi harakatlarni cheklash bo‘yicha tegishli hujjatlar 2 yil avval imzolangan bo‘lsa-da, uning ijrosi ayni paytda qat'iylashtirilmoqda. 

Ta'kidlanishicha, yo‘lovchi tashish bilan shug‘ullanmayotgan, shahar markazida istiqomat qilayotgan Damas haydovchisi yoxud yuk tashish bilan shug‘ullanuvchi aynan shu rusumdagi avtomashinani boshqarib ketayotgan haydovchi uchun cheklovlar istisno etiladi.