Хоразмда Халқаро инвестиция форуми иш бошлади

Иқтисодиёт 20:30 / 05.04.2019 3448

Хоразм вилоятининг Урганч ва Хива шаҳарларида «Халқаро инвестиция форуми ва Хоразм вилояти ишлаб чиқарувчиларининг миллий кўргазмаси» иш бошлади.

5 апрель куни Урганч шаҳрида тадбирнинг тантанали очилиш маросими ўтказилди. Унда Ўзбекистон Республикасининг соҳага мансуб вазирликлари ходимлари, хорижий давлатларнинг ваколатхоналари раҳбарлари, Хитой, БАА, Туркия, Саудия Арабистони, Россия ва бошқа кўплаб мамлакатлардан келган инвесторлар ва донорлар, ишбилармонлар, дипломатик корпус вакиллари, халқаро ташкилотлар ва молия-кредит муассасалари ходимлари, Хоразм вилояти ҳокимлиги вакиллари, жами 400га яқин иштирокчи қатнашди.

Форумдан кўзланган мақсад – Ўзбекистон ва хориж мамлакатларининг ишбилармон давралари ўртасидаги ҳамкорлик муносабатларини ривожлантириш, ўзаро фойдали бўлган шартнома ва битимларни имзолаш ҳисобланади.

Тадбирнинг очилиш маросимида Ўзбекистон Республикаси Савдо-саноат палатаси раҳбари Адҳам Икрамов, Хоразм вилояти ҳокими Фарҳод Эрманов, Инвестиция ва халқаро савдо вазири Сардор Умурзаков, БМТ ривожланиш дастурининг Ўзбекистондаги доимий вакили Матильда Димовска, Европа тараққиёт ва тикланиш банкининг Ўзбекистондаги ваколатхонаси раҳбари Алкис Дракинос, шунингдек хорижлик меҳмонлар сўзга чиқишди.

Шундан сўнг, ишлаб чиқарувчилар, ишбилармонлар ва инвесторлар иштирокида секцияларга бўлинган ҳолда кенгаш ва музокаралар ўтказилди.

Секция кенгашлари «Хоразм вилоятида саноатнинг ривожланиши ва энергиянинг муқобил манбаларидан фойдаланиш истиқболлари», «Хоразм вилояти қишлоқ хўжалигида инвестиция имкониятлари, ердан самарали фойдаланиш ва қишлоқ хўжалиги маҳсулотларини қайта ишлаш истиқболлари», «Инновацион ғоялар ва технологияларни ишлаб чиқиш ва татбиқ қилиш соҳасига инвестицияларни кенг миқёсда жалб қилиш, Хоразм вилоятининг хорижий илмий-маърифий муассасалари билан ҳамкорлигини кенгайтириш истиқболлари», «Туризм соҳасидаги имкониятлар, маданий-тарихий туризм билан биргаликда янги, экология, гастрономия, маданий ва кўнгилочар туризм каби йўналишларини ривожлантириш истиқболлари» мавзусида ўтказилди ва ҳужжатлар имзоланди.

Тадбир доирасида Хоразм вилояти ишлаб чиқарувчилари маҳсулотлари ва туризм салоҳияти бўйича миллий кўргазма ташкил қилинди.

Эртага, 6 апрель куни форум ўз ишини Хива шаҳрида давом эттиради. Унда меҳмонлар саноат корхоналари фаолияти билан танишадилар. Шунингдек Хива шаҳрининг тарихий-меъморий обидаларини зиёрат қиладилар. Шундан сўнг, форум ўз ишини якунлайди.

Кўпроқ янгиликлар