Тошкент давлат иқтисодиёт университетида #BoburDay сайли байрам акцияси ўтказилади

Жамият 20:46 / 12.02.2019 1910

14 февралда Тошкент давлат иқтисодиёт университетида Ўзбекистон ёшлар иттифоқи Марказий Кенгаши, Олий ва ўрта махсус таълим вазирлиги, Вазирлик ҳузуридаги “Маънавият ва маърифат” маркази ҳамда “Ўзбекконцерт” давлат муассасаси кўмагида Заҳириддин Муҳаммад Бобур таваллудининг 536  йиллиги муносабати билан #BoburDay сайли байрам акцияси ўтказилиши режалаштирилган.

Мазкур акцияда ўзини миллий қадриятларимизга дахлдор деб билувчи ҳар бир фуқаро фаол иштирок этиш учун университетга ташриф буюриши ва ҳудудда ўрнатилган буюк сиймо Бобур таваллуд кунига бағишлаб тайёрланган махсус баннерлар, декорация ва иллюстрациялар атрофида суратга тушиб, ўз иштироки ва муносабатини онлайн тизимда турли ижтимоий тармоқларда акс эттириб бориши мумкин.

Акцияда барча юртдошларимиз жумладан, эл севган таниқли санъаткорлар, кино ва театр актёрлари, спортчилар, шунингдек, кенг ёшлар оммаси фаол иштирок этиши кутилмоқда.

Жаҳон трендларидан бирига айланиб улгурган #BoburDay хештеги мана бу йил ҳам Интернет фойдаланувчилари ўртасида яна бир бор улуғ алломанинг ҳаёти ва ижодини фаол тарғиб қилиб, ёшлар ўз тенгдошлари билан дунёнинг барча бурчакларидан туриб мавзу атрофида мулоқот қилишлари ҳамда фикр алмашиши учун имконият яратмоқда. 

Шунингдек, сайлда бир вақтнинг ўзида барча ижтимоий тармоқларнинг фаол фойдаланувчилари ўз постларида #BoburDay xештегини ишлатган ҳолда қатнашишлари мумкин.

#BoburDay сайли Тошкент давлат иқтисодиёт университетида 14 февраль куни соат 9:00дан 18:00гача бўлган вақт оралиғида ўтказилади. 

Кўпроқ янгиликлар