Xiaomi kompaniyasi 22 avgust kuni bo‘lib o‘tadigan POCO brendi ostida ishlab chiqarilgan Pocophone F1 smartfoni taqdimotiga tayyorgarlik ko‘rmoqda. Shu kunlarda internetda uning narxi haqidagi ma'lumot paydo bo‘ldi.

My Smart Price resursining ma'lum qilishicha, Pocophone F1 Hindistonda 360 dollarga yaqin narxda sotuvga chiqadi. Bu 6 GB tezkor va 128 GB doimiy xotiraga ega bo‘lgan smartfonning narxidir. Bundan tashqari, uning 64 GB doimiy xotiraga ega arzonroq versiyasi ham chiqadi.

Snapdragon 845 chipi o‘rnatilgan smartfon 5,99 dyuymli Full HD+ displeyga ega. U 4000 mAs hajmli QC 3.0 tezkor quvvatlanish xususiyatiga ega akkumulyator va ikkita asosiy kamera bilan jihozlangan. Birinchi kamera 12 Mp, ikkinchisi esa 5 Mp o‘lchamda suratga oladi. Qurilma MIUI 9 qobig‘i o‘rnatilgan Android 8.1 Oreo operatsion tizimida ishlaydi.