Rossiyaning N.I.Lobachevskiy nomidagi Nijyegorod davlat universiteti xodimlari fikr kuchi bilan boshqariluvchi mashina – neyromobil yaratishdi. Ma'lum qilinishicha, bu elektrokar jismoniy imkoniyati cheklangan odamlar uchun mo‘ljallangan.

Antiqa mashina Moskvada o‘tadigan “Vuzpromekspo-2017” ixtisoslashgan ko‘rgazmasida 13 dekabrda taqdim etiladi. 

Mashinaning seriyali versiyasi narxi 550-990 ming rublni tashkil qiladi.

Universitet xodimlari odam miyasi va avtomobil bort tizimlari bilan axborot almashishga imkon beruvchi tizim ustida ishlashadi. Olimlar tomondan yaratilgan maxsus algoritmlar odam miyasidagi turli modallikdagi signallarni o‘qib, ularni mashinani boshqaruvchi tizimga uzatadi. Haydovchi fikran tegishli buyruqlar bilan avtomobilni, uning dvigateli, uzatmalar qutisini boshqara oladi.

Neyromobil 20 ot kuchiga ega asinxron elektrodvigatel bilan jihozlanadi. Mashina bir quvvatlanishda bosa oladigan masofa 200-600 km ni tashkil qiladi. Bu esa shahar ichidagi kundalik safarlar va qo‘shni shaharlar orasidagi masofani bosib o‘tishga yetadi. Yangi mashina L7 toifasi bo‘yicha sertifikatlanadi. Bu toifaga 4 g‘ildirakli, og‘irligi 400 kg dan, motori quvvati 15 kVtdan oshmaydigan transport vositalari kiradi. Mashinaning gabarit o‘lchamlari quyidagicha: eni 1480 mm, uzunligi 2995 mm, bo‘yi 1725 mm.     

Ixtirochilarning aytishlaricha, kelgusida ushbu neyromobil platformasi negizida ekologik toza transport vositalari yaratiladi.

Mashinaning seriyali variantini 2019 yilda taqdim qilish rejalashtirilgan.