Bloomberg Billionaires Index (BBI) ma'lumotlariga ko‘ra, rossiyalik milliarderlarning jami boyligi yil boshidan beri 17,099 mlrd dollarga oshgan.

Indeks milliarderlarning ulushlari bo‘lgan kompaniyalar aksiyalari narxi va hisobotlari asosida aniqlanadi. 

Ro‘yxatdagi 49-o‘rinni va rossiyalik badavlat insonlar orasida birinchi o‘rinni «Severstal»ning asosiy aksiyadori Aleksey Mordashov egallagan. Uning boyligi 18,4 mlrd dollar bo‘lib, yil boshidan 1,49 mlrd dollarga oshdi. «Norilskiy nikel» prezidenti Vladimir Potanin 53-o‘rindan joy olgan bo‘lib, uning boyligi 905 mln dollarga ko‘payib, 17,5 mlrd dollarga yetgan. Rossiyaliklar orasida NLMK direktorlar kengashi raisi Vladimir Lisin uchinchi o‘rinda. Uning sarmoyasi 1,6 mlrd dollarga oshib, 16,6 mlrd dollarga yetdi.

Avgust oyida BBI hisob-kitoblariga ko‘ra, rossiyalik milliarderlarning boyligi 9,7 mlrd dollarga oshgani xabar qilingan edi.