Chexiyada 100 yillik issiq harorat rekordi yangilandi

Chexiyada sinoptiklar sentabr oyi o‘rtasi uchun rekord darajadagi issiq haroratni qayd etishdi. Pragada termometrlar +33,2 daraja (Tselsiy) issiq haroratni qayd etishgan.

"Chexiyada beshinchi kunki, issiq harorat rekordi yangilanmoqda. Pragada kunning ikkinchi yarmida termometr +33,2 daraja issiqni ko‘rsatdi. Respublikaning aksar qismida +32 daraja issiq qayd etilgan. Bu esa 100 yillik rekordning yangilanishi hisoblanadi", deyilgan xabarda.

Meteorolog Yan Shramekning aytishicha, Markaziy Yevropada havo bosimi oshib, odatdagidan 10 daraja yuqori, O‘rta Yer dengizi bo‘ylariga xos harorat qayd etilishi kuzatilmoqda. 

Sinoptiklarning prognozlariga ko‘ra, vaziyat hafta o‘rtasigacha saqlanib qoladi. Haftaning ikkinchi yarmida Chexiyaga g‘arbdan yomg‘ir keladi va o‘rtacha harorat 22-25 darajaga tushadi.