Turkiyada muvaffaqiyatsiz amalga oshirilgan harbiy to‘ntarishdan keyin boshlangan yalpi tozalash tadbirlari doirasida Turkish Airlines aviakompaniyasining 100 nafardan ortiq xodimi ishdan bo‘shatilgan. Bu haqda Reuters agentligi xabar tarqatgan.

Manba ma'lumotiga ko‘ra, aviakompaniyada ishdan bo‘shatishlar 24 iyul kuni amalga oshirilgan. Ishini yo‘qotganlar orasida aviakompaniya rahbariyati vakillari ham bor.

Qayd etilishicha, aviakompaniyadagilar bu ma'lumotga izoh berishdan bosh tortishgan.

16 iyulga o‘tar kechasi Turkiyada harbiylar hukumatni o‘z qo‘lga olgani haqida ma'lum qildi. Anqara va Istanbul shaharlariga tanklar olib kirildi.

Turkiya bosh shtabi harbiy to‘ntarish yuz bergani haqida ma'lum qildi.

Turkiya prezidenti Rajab Toyib Erdo‘g‘an isyon boshlangani haqida ma'lum qilib, xalqidan yordam so‘ragach, ko‘chaga chiqqan odamlar yordamida isyon bostirildi.

Tartibsizliklar vaqtida tinch aholi vakillaridan 246 kishi halok bo‘ldi, isyonchilar orasida halok bo‘lganlarning aniq hisobi keltirilmadi. Isyonchilar hisobga olinmaganda, jarohatlanganlar soni 2185 nafarni tashkil qildi.

Erdo‘g‘an bu isyon tashkilotchiligida muxolifatchi Fathulloh Gulenni ayblagan.

Ayni vaqtda mamlakatda isyonga aloqadorlarni qo‘lga olish ishlari davom etmoqda. Shu vaqtgacha 10 mingga yaqin kishi qo‘lga olindi. Davlat organlarida olib borilayotgan yalpi tozalash ishlari doirasida 70 mingga yaqin xizmatchi lavozimidan chetlatildi.

21 iyul kuni Turkiyada 3 oy muddat davom etadigan favqulodda holat tartibi joriy etildi.