Xalqaro hamjamiyat tomonidan tan olingan, Liviya sharqidagi Tobrukda yig‘ilish o‘tkazadigan Liviya parlamenti rahbari Oqila Saloh Iso mamlakatda umumiy safarbarlikni e'lon qildi. Bu haqda Al Arabiya telekanali ma'lum qildi.  

Telekanal ma'lumotlariga ko‘ra, "Liviya parlamenti spikeri umumiy safarbarlikni e'lon qildi va armiya shtabi boshlig‘i general Abdurazzoq an-Nazuriyni mamlakat sharqidagi hududga harbiy komendant etib tayinladi". Bu hudud Liviya sharqidagi Dernadan g‘arbidagi Ben-Javad aholi punktigacha qilib belgilandi. Bu hududlar Liviyaning sharqidagi sohilbo‘yi chizig‘ining yarmiga yaqinini qamrab oladi. 

Telekanalning ta'kidlashicha, vakillar palatasi boshlig‘i bunday qarorni "mamlakatning muvaqqat hukumati va armiyadagi eng yuqori darajadagi jiddiy maslahlashuvlardan keyin" qabul qildi. 

Liviyada 2011 yil fevraldagi xalq g‘alayonlari va undan keyin yuz bergan hamda Muammar Kazzofiyning taxtdan ag‘darilishi va o‘ldirilishiga olib kelgan urushdan so‘ng mamlakat ikkita qarama-qarshi tomonga ajralgan. Uzoq davom etayotgan harbiy mojaroda qolgan davlatda ikkita hukumat va ikkita parlament: jahon hamjamiyati nuqtai nazaridan qonuniy Vakillar palatasi va Tripolida joylashgan Umummilliy kongress paydo bo‘ldi.

Liviyada bir muddat avval Faiz Saraj boshchiligidagi yangi milliy hamjihatlik hukumati shakllantirildi, bu hukumat hozirdayoq ko‘plab davlatlar va xalqaro tashkilotlar tomonidan tan olindi.