Toshkentda 19 mart kechki payt o‘tkazilgan boks kechasida O‘zbekistonlik bokschi Dilshod Mahmudov (69 kg gacha) va turkiyalik Onder Sipal o‘rtasida AIBA Pro Boxing (APB) musobaqasining 2-davra jangi bo‘lib o‘tdi. Mahmudov va Sipal ringda avval ham bir necha bor to‘qnash kelgan.

Bokschilar hayotda do‘st bo‘lsa-da, biroq ringda ular raqiblar. Jang vaqtida ikkala bokschi ham bir-biriga zarbalar berishdan “uyalmadi” hamda ommani junbushga keltirgan “qotib turib, keyin birdaniga ketma-ket zarbalar berish” bilan bog‘liq “shou”lar ko‘rsatishdi: sportchilar bir necha soniyaga harakatsiz raqibning zarbasini kutib turishdi hamda raqiblari biror harakat qilishi bilanoq ketma-ket zarbalar berib, bu bilan ommaga zavq ulashdilar.

Jang nafaqat shunday “shou”larga, balki ikkala bokschi jangning turli raundlarida bir-birini aniq zarbalar bilan toyitib qo‘ygan holatlarga ham boy bo‘ldi. Shunga qaramay, o‘zbekistonlik charm ko‘lqop ustasi Dilshod Mahmudov raqibidan biroz ustunroq ko‘rindi va hakamlar qaroriga ko‘ra, 3-0 (60:54, 58:56, 58:56) hisobida g‘alabani qo‘lga kiritdi.