Buyuk Britaniyada shoir va dramaturg Uilyam Shekspirning qo‘lyozmasi raqamli ko‘rinishga keltiriladi, deb xabar bermoqda The Independent nashri. Raqamlashtirilgan nusxalar internetga qo‘yilmoqchi.

Ushbu loyiha bilan Britaniya kutubxonasi shug‘ullanmoqda. Muallifligi dramaturglar jamoasiga tegishli ekanligi aytiladigan “Ser Tomas Mor” pesasi Shekspirga tegishli yozuvlar bo‘lgan yagona saqlanib qolingan qo‘lyozma hisoblanadi.

Pesaning Shekspirga tegishli qismida pesa qahramoni Londondagi fransiyalik qochqinlar foydasiga nutq so‘zlaydi.

Raqamlashtirilgan sahifalarni Discovering Literature: Shakespeare saytida ko‘rish mumkin bo‘ladi.

Umumiy hisobda Britaniya kutubxonasi 300 dan ko‘proq qo‘lyozma, kitob, xarita va boshqa materiallarni skanerlamoqchi.

Avvalroq britaniyalik olimlar Shekspirning qabrini skaner qilishgani ma'lum qilingandi.