Doimiy muomalada bo‘luvchi qog‘oz pullar ma'lum muddat o‘tib, yaroqsiz holatga kelib qolishi mumkin. Ana shunday vaziyatda ko‘pchilik nima qilishni, qayerga murojaat etishni bilmaydi. Aslida esa buning qonuniy chora-tadbirlar belgilangan. O‘zi qanday holatdagi banknotlar to‘lovga yaroqli yoki yaroqsiz?

Bu savolga O‘zbekiston Respublikasi Markaziy banki raisi o‘rinbosari Sherzod Hajimuratov “Darakchi” nashri orqali javob berdi:

O‘zbekiston Respublikasi Adliya vazirligida 2008 yil 27 iyunda 1831-son bilan ro‘yxatga olingan “Tijorat banklarida kassa ishini tashkil etish, inkassatsiya va qimmatliklarni tashishga doir Yo‘qriqnoma”ga ko‘ra, quyidagi hollarda “so‘m” to‘lovga yaroqli hisoblanadi hamda barcha xo‘jalik yurituvchi sub'yektlar tomonidan hech bir moneliksiz to‘lovga qabul qilinishi lozim:

a) har qanday qismida teshik yoki yirtilishlar, siyqalanishlar, dog‘lar, qalam, siyoh va flomaster bilan yozilgan yozuvlari mavjud bo‘lgan pullar;

b) yirtilgan va yelimlangan pullar, agar pulning ikkala qismi shak-shubhasiz bitta banknotga tegishli bo‘lsa;

v) bo‘yoq moddalari va kislota to‘kilgan, tabiiy rangi o‘zgargan, kuygan, bo‘yalgan yoki chizilgan pullar;

g) banknot hajmining 55 foizdan kam bo‘lmagan qismi saqlanib qolingan pullar.

Shikastlangan pullar “eskirgan” pullar toifasiga kiritilib, to‘lovga yaroqli hisoblanadi va banklar tomonidan ular shu qiymatdagi pullarga almashtirilib beriladi.