2028 йилги Олимпия ўйинларида аёл спортчилар биринчи марта кўпчиликни ташкил қилади

Шунингдек, бешта янги спорт тури киритилади, мусобақалар сони ҳам ошади.

Фото: REUTERS

Халқаро олимпия қўмитаси (ХОҚ) 2028 йилда Лос-Анжелесда бўлиб ўтадиган Олимпиада ўйинларида тарихда биринчи марта аёл иштирокчилари сони эркаклар сонидан кўп бўлишини маълум қилди – мос равишда 5655 ва 5543 нафар.

Ушбу тарихий ўзгариш баъзи спорт турларида ҳам ўз аксини топади. Масалан, футбол мусобақасида 16 та аёллар жамоаси иштирок этади, бу эркаклар жамоалари сонидан (12 та) кўпдир. Шунингдек, қўшимча вазн тоифасини жорий этиш орқали аёллар бокси ҳам кенгайтирилади.

ХОҚ расмийларининг таъкидлашича, «гендер тенглик спортчилар квотаси ва мусобақалар сонини белгилашда асосий омил бўлди».

Қўшма Штатларда бўлиб ўтадиган ўйинларда 351 та медал жамланмаси ўйналади, бу 2024 йилда Париж Олимпиадасидан 22 тага кўп. Дастур бешта янги спорт турини (лакрос, крикет, байроқли футбол, сквош ва бейсбол/софтбол) ва олтита аралаш жамоавий мусобақани ўз ичига олади, жумладан, камондан отиш, 4х100 м эстафета, гольф, гимнастика, эшкак эшиш ва стол тенниси бўйича.

#ХОҚ #Ёзги Олимпиада #Лос-Анжелес 2028