Халқаро олимпия қўмитасига илк бор аёл киши президентликка сайланди

Зимбабвелик Кирсти Ковентри Халқаро олимпия қўмитаси президентлигига сайланди. У мазкур лавозимни эгаллаган биринчи аёл бўлади.

Фото: AP

Кирсти Ковентри Халқаро олимпия қўмитасининг (ХОҚ) янги президенти этиб сайланди. Бу ҳақда ташкилот сайти орқали маълум қилинди.

Ковентри ХОҚнинг Грецияда ўтказилган 144-сессиясида яширин овоз бериш орқали етти нафар номзод ичидан сайланган. У энди саккиз йил давомида мазкур лавозимда фаолият юритади ва 23 июн куни ваколатлар топширилганидан кейин ишга киришади.

41 ёшли Ковентри зимбабвелик бўлиб, собиқ сузувчи. У икки карра Олимпиада ва етти карра жаҳон чемпиони, бир нечта жаҳон рекордларини ўрнатган. Зимбабведа Ковентри 2018 йилдан бери спорт вазири лавозимида ишлаб келаётган эди. 2013 йилдан бери у ХОҚ аъзоси. Шунингдек, у 2017 йилдан 2024 йилга қадар Халқаро сёрфинг федерацияси вице-президентли лавозимида ҳам фаолият юритган.

Қўмитанинг қайд этишича, Ковентри ХОҚ президенти лавозимини эгаллаган нафақат биринчи аёл, балки биринчи африкаликка айланади. Унинг биринчи ўйинлари 2026 йилда Миланда ва Кортинада бўлиб ўтадиган қишки Олимпиада бўлади. Ковентри, шунингдек, Россиянинг ўйинларга қўйилиши билан боғлиқ масалаларни ҳал қилиши керак. Аммо у сайловларда тақдим этган қисқа тақдимотида бу масала бўйича ҳеч нарса демаган.

Кирсти Ковентри ХОҚнинг 10-президентига айланади. Унга қадар мазкур лавозимни 12 йил давомида германиялик Томас Бах эгаллаб келди. У 2013 йилда лавозимга сайланган, 2021 йилда эса яна тўрт йил муддатга қайта сайланган эди.

#ХОҚ #Кирсти Ковентри