Трамп Европадан молиявий репарация талаб қилди

АҚШ президенти Доналд Трамп фонд бозорларидаги кескин вазиятга қасддан туртки бермаганини, аммо АҚШ савдо балансидаги номутаносибликни бартараф этиш мақсадини яна бир бор таъкидлади.

Ўтган ҳафта Трамп дунё мамлакатларига бож тарифларини эълон қилганидан кейин глобал фонд бозорларида қулаш юз берди. Хитой ҳам жавоб тарифларини эълон қилгач, глобал савдо уруши янада кучайгани маълум бўлди.

«Мен нимадир нотўғри кетишини истамайман, лекин баъзида бирор нарсани даволаш учун дори-дармонларни қабул қилиш керак», деди Трамп. «Биз Хитой билан савдо дефицитимизни ҳал қилишимиз керак», деб давом этди у. «Бизда Хитой билан триллион долларлик савдо тақчиллиги бор - йилига юзлаб миллиард доллар йўқотмоқдамиз. Бу муаммони ҳал қилмагунимизча, мен келишувга эришмоқчи эмасман».

Трамп, шунингдек, Европадан молиявий репарация талаб қилди: «Биз Европага катта тариф қўйдик. Улар музокаралар столига ўтиради. Улар гаплашмоқчи, лекин ҳар йили бизга катта пул тўламагунча ҳеч қандай гап бўлмайди - нафақат ҳозирги, балки ўтмиш учун ҳам».

Ўтган ҳафта президент агар бошқа давлатлар «оламшумул» таклиф қилса, музокаралар учун очиқлигини айтган эди.