Хитойлик аёл собиқ турмуш ўртоғидан уй ишларини бажариб келгани учун 35 минг доллар ундирди

Хитойда ажрашаётган аёл собиқ турмуш ўртоғидан йиллар давомида бажарган уй ишлари учун 7 минг доллар талаб қилди. Бироқ суд унинг ҳолатини инобатга олиб, тўлов миқдорини 35 минг доллар этиб белгилади, деб хабар беради South China Morning Post.

Қайд этилишича, Ху ва Ван 13 йил давомида бирга яшаб, бир қизни тарбия қилган, аммо охирги йилларда уларнинг муносабати жуда ёмонлашган. Навбатдаги жанжалдан кейин аёл уйдан чиқиб кетган ва ажрашиш учун ариза берган.

Мол-мулкни бўлиш ва қизининг васийлигини белгилашдан ташқари, Ху суд орқали бажарган уй ишлари учун 7 минг доллар талаб қилган. Хитой Фуқаролик кодексига кўра, агар томонлардан бири бу мажбуриятларни бажармаган бўлса, иккинчи томон уй ишлари учун компенсация талаб қилиш ҳуқуқига эга.

Таъкидланишича, аёл ушбу компенсация учун тўла ҳақли ҳисобланади, чунки у турмушга чиқиш учун ишдан бўшаган ва бутун вақтини қизини тарбиялаш ва уй ишларини тартибга келтиришга қаратган. Турмуш ўртоғи эса уй ишлари билан умуман шуғулланмаган.

Суд иш ҳужжатларини ўрганиб чиқиб, аёлнинг ҳолатига ҳамдардлик билдирган, васийлик ва алимент тўлаш мажбуриятини тасдиқлаган ҳамда уй ишлари учун компенсация суммасини 35 минг долларгача оширган.

Бу ажрашаётган эркакни жуда ажаблантирган, аммо суд вакиллари унга «никоҳ – бу икки томон учун ҳам меҳнат» эканини тушунтирган.

«Биз унга уй ишлари кўзга кўринмас бўлиши мумкинлиги, аммо бу уларнинг қиймати йўқ дегани эмаслигини айтдик. Уй ишлари эр-хотин ўртасида тенг тақсимланиши керак», – дейди судья ёрдамчиси Фу Сайя.