Tesla Cybertruck етказиб беришни вақтинча тўхтатди — машинанинг кузов қисмлари узилиб тушмоқда

Electrek нашрининг хабар беришича, Tesla компанияси ўзининг агентларига мижозларга Cybertruck электр пикапини етказишни тўхтатиш буйруғини берган. Бунга сабаб қилиб пикап кузовини ташкил этувчи зангламас пўлат панелларнинг яхши ёпиштирилмагани ва вақт ўтиши билан бу муаммо оғирлашиши мумкинлиги кўрсатилмоқда.

Бу муаммоларга қўшимча равишда газ педали ва ташқи қопламадаги нуқсонлар сабабли модел бир неча бор қайтариб олинган.

Айниқса, совуқ иқлимли ҳудудларда фойдаланувчилар кузов панелларини ушлаб турувчи елим модда қотиб қолиши сабабли металл қисмлар ажралиб кетаётганидан шикоят қилишмоқда. Бу муаммо илгари ҳам кузатилган, аммо Tesla томонидан ҳал қилинмаган. Энг сўнгги вазиятда эса бир Cybertruck'нинг олд бампери тўлиқ ажралиб кетгани акс этган тасвир интернетда кенг тарқалди, бу эса йирик муаммо сифатида баҳоланмоқда.

Харидорлар шунингдек, Cybertruck устидаг National Highway Traffic Safety Administration (NHTSA) — АҚШ йўл ҳаракати хавфсизлиги бошқармасига ҳам шикоятлар юбораётганини таъкидламоқда. Улар Cybertruck кузовидан туртиб чиққан ўткир қиррали металл қисмлар, автомобил ҳаракат пайтида шамол таъсирида титраётгани, овоз чиқараётганини маълум қилишган ва бошқа бир қатор хавфли нуқсонлар ҳақида хабар беришган.

Tesla'нинг электр пикапи ишлаб чиқариш жараёнида турли муаммоларга дуч келди. Улар орасида:

• Газ педалидаги нуқсонлар, у ёпишиб қолиши ёки бутунлай ажралиб кетиши;
• Кузов пластик қисмларининг мустаҳкам эмаслиги;
• Баъзи моделларда ишлаб чиқаришда муаммолар мавжудлиги кабилар бор.

YouTube блогери WhistlinDiesel номли машҳур контент яратувчиси Cybertruckнинг чидамлилиги бўйича тест ўтказиб, уни осонгина шикастлаш мумкинлигини исботлади. Бу эса кенг жамоатчиликда қизғин муҳокамага сабаб бўлди.

Tesla шу ҳафта Cybertruck рамкасини пўлатдан алюминийга ўзгартириш бўйича қарор қабул қилганини эълон қилди. Бу эса кузов вазнини ошириб, автомобилнинг юк кўтариш имкониятини пасайтириши мумкин.

Илон Маск олдинроқ Cybertruck ҳақида «биз уни жуда мустаҳкам ва юк кўтариш қобилияти юқори қилиб яратамиз», деган эди. Бироқ компаниянинг сўнгги қарорлари бу ваъдаларни шубҳа остига қўймоқда.

Cybertruck сотувлари жуда паст даражада қолмоқда. Cox Automotive маълумотларига кўра, 2024 йилда Tesla бор-йўғи 39 минг дона Cybertruck сотган. Бу кўрсаткич ишлаб чиқариш имкониятларидан анча кам – компания йилига 125 мингдан ортиқ автомобил ишлаб чиқариш қувватига эга. Сотувни рағбатлантириш мақсадида Tesla молиявий дастур таклиф қилмоқда: 2 йиллик фоиз ставкаси билан автокредитлар бериш бошланган.

Ҳозирча Cybertruck бошқа электропикаплардан сотув кўрсаткичлари бўйича олдинда бўлса-да, бу модель Teslaʼнинг энг катта муваффақиятсизликларидан бирига айланиши мумкин. Чунки унинг ишлаб чиқарилишига катта умид боғланган эди ва дастлабки буюртмалар сони 2 млнга яқинлашган эди.

Шу билан бирга, Cybertruckнинг All-Wheel Drive версияси ($80,000) сотиб олувчилар учун ҳукумат томонидан 7,5 минг доллар миқдорида солиқ имтиёзи тақдим этилиши мумкин. Шунингдек, АҚШ собиқ президенти Доналд Трамп америкаликлардан Tesla маҳсулотларини қўллаб-қувватлашга чақирди, бу эса компанияга қўшимча рағбат беради.

Шундай бўлса-да, Cybertruck атрофидаги муаммолар, айниқса, сифат ва ишончсизлик масалалари, унинг узоқ муддатли истиқболини шубҳа остига қўймоқда.