NBC: Трамп Россиянинг илтимосига кўра Келлогни музокаралардан четлаштирди

АҚШ президенти Доналд Трамп ўзининг Россия ва Украина бўйича махсус вакили Кит Келлогни Москва илтимосига биноан урушни ҳал қилиш бўйича олий даражадаги музокаралардан четлатди, деб хабар берди NBC News 13 март, пайшанба куни манбаларга таяниб. Журналистларга кўра, Россия президенти Владимир Путин уни жуда «украинапараст» деб ҳисоблаган.

Журналистларнинг таъкидлашича, Келлог Саудия Арабистонида Россия ва Украина делегациялари билан сўнгги музокараларда иштирок этмаган, гарчи улар «унинг ваколатига кирган». «Келлог Украинага жуда яқин бўлган собиқ америкалик генерал. У бизнинг одамимиз эмас, биз излаётган калибр ҳам эмас», — деб NBC россиялик мулозимлардан иқтибос келтирган.

Келлог: АҚШ Россия билан муносабатларни қайтадан бошламоқчи

Вашингтон Москва билан муносабатларини тиклаши керак, чунки Украинада давом этаётган уруш шароитида яккаланиш сиёсати энди самара бермаяпти. Бу ҳақда 6 март куни АҚШнинг Украина ва Россия бўйича махсус вакили Кит Келлог Вашингтондаги Ташқи алоқалар кенгашидаги чиқиши чоғида айтиб ўтди.

Келлог Вашингтон ва Москва ўртасидаги муносабатларни тиклаш истагини АҚШ миллий манфаатларини ҳимоя қилиш ва АҚШнинг «чексиз прокси-уруш»га тортилишининг олдини олиш истаги билан изоҳлади.

«Демак, сиз ҳозир кўраётган ва гувоҳ бўлаётган нарса Трамп маъмуриятининг тинчлик келишувига эришиш учун иккала томонни столга тортишга қаратилган шошилинч саъй-ҳаракатларидир», деди Келлог ва Оқ уй урушни тугатиш учун ҳар икки томонга босим ўтказишини қўшимча қилди.

Россияга нисбатан бундай босимга мисол сифатида Трампнинг махсус вакили АҚШнинг Россия Федерациясининг «соядаги флоти»га қарши санкцияларини келтирди. Трамп Россияга босимни кучайтириш учун қўллаши мумкин бўлган бошқа стратегиялар орасида Украинани қайта тиклашга ёрдам бериш учун музлатилган Россия активларини тортиб олиш ва Россия энергетикасига максимал босим ўтказиш бор, деди Келлог.