АҚШ Трамп талаблари бажарилмаса, Мексикага «ҳарбий ҳаракатлар» билан таҳдид қилди

Пентагон раҳбари Пит Ҳегсет Мексиканинг олий ҳарбий раҳбарлари билан музокаралар чоғида АҚШ президенти Доналд Трамп талабларини бажаришга чақирди.

Жумладан, агар Мексика ҳукумати наркокартеллар билан «келишув»ни бартараф қилмаса, АҚШ ҳарбийлари «бир томонлама чора кўриши»ни айтди.

The Wall Street Journal нашрининг ёзишича, суҳбат 31 январь куни ўтказилган ва Пентагоннинг янги раҳбари ва Мексика ҳарбий қўмондонлиги ўртасидаги илк расмий алоқа бўлган.

WSJ манбаларининг таъкидлашича, Мексика олий раҳбарияти Хегсет сўзларининг оҳангидан «ҳайратда ва ғазабда» қолган, чунки улар буни мамлакат ҳудудида тўлиқ миқёсли ҳарбий ҳаракатлар бошлаш таҳдиди сифатида қабул қилган.

Мексика ҳукуматининг наркокартеллар билан алоқалари коррупция, зўравонлик ва сиёсий беқарорликни ўз ичига олган мураккаб ва кўп қатламли муаммодир. Мексика ўнлаб йиллар давомида гиёҳванд картеллари билан курашиб келмоқда, бироқ кўп ҳолатлар коррупцияга ботган амалдорлар ва хавфсизлик кучларининг жиноий гуруҳлар билан ҳамкорлик қилгани ёки уларнинг фаолиятига кўз юмаётганини кўрсатади.

Кўплаб полициячилар, ҳарбийлар ва ҳатто ҳуқуқ-тартибот идоралари ходимларининг картеллар билан алоқаси борлиги аниқланган. Картеллар сиёсатчиларнинг сайлов кампанияларини ҳимоя қилиш ёки «аралашмаслик» эвазига молиялаштиради. Баъзи ҳудудларда картеллар аслида маҳаллий ҳокимиятларни назорат қилади ва амалдорларга босим ўтказади.