Bloomberg: Туркия Украинага тинчликпарвар кучларини юборишга тайёр

Туркия ўз ҳарбийларини Украинага тинчликпарвар кучлар сифатида юборишга тайёр, деб хабар берди Bloomberg 27 феврал, пайшанба куни манбаларга таяниб. Хабарда айтилишича, мамлакат президенти Ражаб Тоййиб Эрдўған феврал ойи бошида Анқарада бўлиб ўтган учрашувларда украиналик ҳамкасби Володимир Зеленский ва Россия ташқи ишлар вазири Сергей Лавров билан бу масалани муҳокама қилган.

Туркиянинг потенциал ўт очишни тўхтатиш режимини кузатишда ёрдам беришга тайёрлиги Европадаги иттифоқчилар, жумладан, бу борада режалар тузаётган Британия ва Франция учун муҳим. Аммо, Bloomberg манбалари таъкидлаганидек, Анқара агар у барча маслаҳатлашувлар ва уни шакллантиришга тайёргарлик кўриш бўйича бошқа тадбирларда қатнашмаса, тинчликпарварлик миссиясининг бир қисми бўлиш ниятида эмас.

Bloomberg мақоласи чоп этилганидан кўп ўтмай, Россиянинг РИА "Новости" ахборот агентлиги Эрдўған маъмуриятига таяниб, Туркия Украинадаги вазиятни ҳал қилиш учун дипломатик воситачилик қилишга тайёрлигини, бироқ қўшин юбормаслигини маълум қилди. «Бизда бундай маълумотлар йўқ, бу борада ҳеч қандай расмий баёнотлар бўлмаган», — дея Туркия президенти маъмуриятининг «расмий баёнотларга таяниб» жавобини келтирмоқда агентлик.

Россия Украинада НАТО тинчликпарвар кучлари бўлишини хоҳламайди

18 феврал куни Россия ТИВ раҳбари Россия НАТОга аъзо давлатлар тинчликпарвар қўшинларининг Украинада пайдо бўлишини қабул қилиб бўлмас деб билишини маълум қилди. Лавровнинг сўзларига кўра, АҚШ делегацияси билан Саудия Арабистонида бўлиб ўтган музокаралар чоғида Россия томони «можаро аллақачон ҳал қилинган ёки келишувга эришилгандан сўнг, айрим қуролли кучларни, тинчликпарвар кучларни жойлаштириш эҳтимоли» мавзусини тилга олган. «Биз бугун тушунтирдикки, бир хил НАТО давлатларидан бўлган қўшинлар, қуролли кучлар Европа Иттифоқи байроғи остида ёки миллий байроқлар остида пайдо бўлиши бу борада ҳеч нарсани ўзгартирмайди. Бу, албатта, биз учун номақбулдир», — деди вазир.