NBC: Россия аннексия қилинган ҳудуддан ресурсларни АҚШга таклиф қилмоқда

Россия АҚШ президенти Доналд Трамп маъмуриятига Россия томонидан аннексия қилинган Украина ҳудудида жойлашган баъзи минерал ресурслар, жумладан, нодир металларга эгалик ҳуқуқини АҚШга ўтказиши мумкин бўлган келишув тузиш имкониятини таклиф қилди. Бу ҳақда 26 феврал, чоршанба куни NBC News ўз веб-сайтида бу борадаги разведка маълумотлари билан таниш бўлган исми ошкор этилмаган икки нафар америкалик расмий ва бошқа хабардор манбага таяниб хабар берди.

Телеканал манбаларига кўра, Россия президенти Владимир Путиннинг юқори мартабали ёрдамчилари Саудия Арабистонидаги учрашувда Трамп маъмурияти вакиллари билан юқоридаги фикрни муҳокама қилган.

Америка расмийларининг аниқлик киритишича, муҳокама АҚШнинг Россия ўзининг «янги ҳудудлари» деб ҳисоблаган Донецк ва Запорижжя вилоятларидаги конларга кириши ҳақида кетмоқда. Манбаларга кўра, Америка томони бу келишувга рози бўлмаган, бироқ уни ҳам рад этмаган.

«Трамп транзакцион ўйинчи, шунинг учун Путин буни тушуниб, шундай қарши ҳаракатни ўйлаб топди», дея минтақада тажрибага эга собиқ америкалик дипломатдан иқтибос келтиради журналистлар. Манбага кўра, Россия Трампнинг Украинанинг табиий ресурсларига қизиқишини ҳам, Зеленскийнинг келишувнинг дастлабки вариантини имзолашдан бош тортганини ҳам аниқ кўрган.

Трамп «иқтисодий ривожланиш» бўйича келишувлар ҳақида

«Биз иқтисодий ривожланиш бўйича қандайдир битимлар тузишга ҳаракат қиляпмиз. Уларда (Россия) биз олишни истаган нарсалар кўп», — деди Трампнинг ўзи 24 феврал куни журналистлар билан суҳбатда. «Биласизми, уларда ноёб ер металларининг катта захиралари бор. Улар... жуда катта...»

«Агар биз буни қила олсак, менимча, бу дунё тинчлиги ва узоқ муддатли тинчлик учун жуда яхши бўлар эди», — дея қўшимча қилди Трамп. «Худди Украина билан қилганимиз каби, агар биз Россияни иқтисодий жиҳатдан ривожлантириб, хоҳлаган нарсамизга эриша олсак, шунга ўхшаш нарса бўлиши мумкин эди».

25 феврал куни Трамп Россия билан ҳозир у назорат қилаётган Украина ҳудудидаги минерал ресурслар бўйича келишув «бўлиши мумкинлигини» айтди, бироқ у буни Путин билан муҳокама қилганми ёки йўқми, аниқлик киритмади, деб ёзади NBC.