АҚШ БМТ таркибидан чиқиш ва уни молиялаштиришни тўхтатиш масаласини кўриб чиқади

Республикачи сенатор Майк Ли АҚШ Сенатига «БМТ таркибидан бутунлай чиқиб кетиш» ҳақидаги қонун лойиҳасини киритди. Конгресс юқори палатаси сайтида чоп этилган пресс-релизга кўра, ташаббус муаллифи Қўшма Штатлар БМТ таркибидан чиқиши ва уни молиялаштиришни тўхтатиши керак, деб ҳисоблайди.

Қонун лойиҳасининг асосий элементлари:

- 1945 йилда Конгресс томонидан қабул қилинган Бирлашган Миллатлар Ташкилоти фаолиятида иштирок этиш тўғрисидаги қонун ва БМТ Бош қароргоҳи (Нью-Йорк шаҳрида жойлашган) тўғрисидаги битим каби асосий ҳужжатларни бекор қилиш;

- Қўшма Штатлар томонидан БМТ фаолиятини молиялаштиришнинг барча шаклларини, шу жумладан мажбурий ва ихтиёрий бадалларни тўхтатиш;

- АҚШ ҳарбийларининг БМТ тинчликпарвар операцияларида ҳар қандай иштирокини тақиқлаш;

- Жаҳон соғлиқни сақлаш ташкилоти (ЖССТ) ва БМТ конвенцияларидан расман чиқиш;

- БМТ билан келажакдаги ҳар қандай ҳамкорликнинг Сенат томонидан маъқулланиши.

«Америкаликларнинг машаққат билан ишлаб топган пуллари бизнинг қадриятларимизга қарши курашувчи, золимларга ёрдамлашувчи, иттифоқчиларга хиёнат қиладиган ва мутаассибликни ёядиган ташаббусларга йўналтирилди. Келажакда БМТ билан ҳамкорлик фақат бизнинг шартларимиз бўйича бўлиши керак», деди Ли.

«БМТ бизнинг ишончимизга қайта-қайта хиёнат қилди ва биз уларнинг соғин сигирига айланиб, ўз миллий хавфсизлигимиз ва манфаатларимизга путур етказа олмаймиз», деди ташаббусни қўллаб-қувватлаган сенатор Марша Блэкберн. Унинг сўзларига кўра, қонун билан АҚШ БМТ фаолиятини молиялаштиришни бутунлай тўхтатиб қўяди ва «бу ташкилотни ҲАМАС ва Хитой Коммунистик партияси террорчилари ёнини олгани учун жавобгарликка тортади».

Вакиллар палатасининг икки нафар республикачиси ҳам қонун лойиҳасини Конгресснинг қуйи палатасига тақдим этади. Улардан бири Чип Рой БМТни ҲАМАСни қўллаб-қувватлашда ва АҚШ иттифоқчиси бўлган Исроилни нишонга олишда, шунингдек, «иқлим талвасасини тарқатишда» ва «Хитойнинг мажбурий аборт ва стерилизация дастурларини яширишда» айблади.

«БМТ нимага эришди? Барча пул ва эътиборга қарамай, бу бузуқ глобалистик ташкилот ўнлаб йиллар давомида урушлар, геноцидлар, инсон ҳуқуқлари бузилиши ва ҳатто пандемияларнинг олдини ололмади», деди Рой.

АҚШ Халқаро алоқалар кенгаши маълумотларига кўра, Қўшма Штатлар 2022 йилда БМТга 18 миллиард доллар хайрия қилган, бу ташкилот бюджетининг учдан бир қисмини ташкил этган.