Германия автосаноати Евроиттифоқни АҚШга божлар бўйича имтиёз беришга чақирди

Германия автомобил саноати ассоциацияси (VDA) АҚШнинг автомобиллар учун импорт божларини ошириш эҳтимолий зарари ҳақида огоҳлантирди ва шу билан бирга Европа Иттифоқини Вашингтонга ён беришга чақирди. 19 феврал, чоршанба куни VDA раҳбари Хилдегард Мюллер: «Президент Трамп томонидан эълон қилинган 25 фоизлик тариф даражаси провокациядир» деди, дея хабар бермоқда Reuters.

Унинг сўзларига кўра, агар Трамп импорт қилинадиган автомобилларга божларни оширса, бу Европа Иттифоқининг АҚШга экспортига путур етказади ва иккала қитъанинг фаровонлигига зарар келтиради. Агар Брюссел АҚШга қарши тарифлар билан жавоб беришга қарор қилса, бу охир-оқибат истеъмолчилар учун юқори нархларга олиб келадиган спирални бошлайди. «АҚШ президенти Доналд Трамп ваъда қилинган инфляцияга қарши кураш ўрнига уни фақат АҚШда рағбатлантиради», деди VDA раҳбари. У Европа Иттифоқини Америка Қўшма Штатлари билан «ярим йўлда учрашишга» чақирди.

Трампнинг «ўзаро тарифлари»

18 феврал куни Оқ уй раҳбари импорт қилинадиган автомобилларга 25 фоизлик божлар, шунингдек, фармацевтика ва яримўтказгичларга божлар жорий этиш имкониятини маълум қилди. Аввалроқ Трамп АҚШнинг савдо ҳамкорларига «ўзаро тарифлар»ни жорий этишга тайёргарлик кўриш тўғрисидаги меморандумни имзолаган эди.

Ҳозирда Европа Иттифоқининг АҚШдан келаётган енгил автомобиллари учун божхона тўлови 10 фоизни ташкил этади, АҚШга олиб кириладиган Европа автомобилларига эса 2,5 фоизлик бож тўланади. BMW бош директори Оливер Ципсе аллақачон Европа Иттифоқини АҚШ билан тарифларни тенглаштиришга чақирган, дея қайд этади Reuters.