АҚШ вице-президенти Зеленскийга Трампни танқид қилмасликни маслаҳат берди

Украина президенти Володимир Зеленский америкалик ҳамкасби Доналд Трампни омма олдида танқид қилмаслиги керак эди, дейди АҚШ вице-президенти Жей Ди Вэнс.

Унинг айтишича, Зеленскийга АҚШнинг янги маъмурияти билан мулоқот қилиш бўйича «ёмон маслаҳатлар» беришган.

«Зеленский президент фикрини уни ОАВда ҳақорат қилган ҳолда ўзгартиришга уринмоқда. Президентни таниган барча айтиши мумкинки, бу мазкур маъмурият билан иш олиб боришнинг жирканч усули», — дейди Вэнс.

Унинг таъкидлашича, Трампнинг позицияси Зеленский айтганидек Россия «дезинформация»сига асосланмаган. «Трамп, ўйлайманки, геосиёсатни яхши тушунади ва жуда қатъий позицияга эга бўлиб, у узоқ вақтдан бери ўзгармай келади», — дея қайд этади Вэнс.

АҚШ президенти 18 феврал куни Украинада анчадан бери сайловлар бўлмагани, уни ўтказишга Россия эмас, мамлакатдаги вазият туртки бераётганини маълум қилди. Шунингдек, у Зеленскийнинг ишонч рейтинги 4 фоизни ташкил этишини таъкидлади.

Украина етакчиси шундан сўнг ушбу маълумотлар «Россия дезинформацияси» эканини айтди. «Агар кимдир мени ҳозироқ алмаштирмоқчи бўлса, бунинг иложи йўқ», дея қўшимча қилди Зеленский.

Шунингдек, у ишонч рейтинги жуда паст эканини рад этиб, Киев халқаро социология институтининг охирги сўровидаги маълумотларда унга украиналикларнинг 57 фоизи ишониши аниқланганини таъкидлади.

19 феврал куни Трамп Украинада сайловлар ўтказиш мавзусини давом эттириб, Зеленскийни «сайловсиз диктатор» деб атади. «Сайловсиз диктатор, Зеленский тезроқ ҳаракат қилгани маъқул, акс ҳолда мамлакатидан ажралади», деди Трамп. Унинг сўзларига кўра, АҚШ ҳозирда урушни тўхтатиш бўйича Россия билан муваффақиятли музокаралар олиб бормоқда, «Зеленский эса даҳшатли ишларни қилган, унинг мамлакати вайрон бўлган, миллионлаб одамлар беҳуда ҳалок бўлган ва бу давом этмоқда».

Украинада президентлик сайловлари 2024 йил март охирида бўлиб ўтиши керак эди, аммо ҳарбий ҳолат туфайли у ўтказилмади. Май ойида Зеленскийнинг беш йиллик ваколати тугади. Россия шундан буён Украина президентини «нолегитим» дея ҳисоблаб келмоқда.