Туск: Полша Украинага тинчликпарвар кучларини юбормайди

Полша ўз қўшинларини Украинага эҳтимолий тинчликпарварлик миссияси доирасида юбориш ниятида эмас, деди Полша бош вазири Доналд Туск 17 феврал, душанба куни. «Полша қўшинларини Украинага юбориш ниятимиз йўқ, бироқ биз келажакда бундай кафолатлар беришни исташи мумкин бўлган давлатларга логистик ва сиёсий ёрдам кўрсатамиз», — дея Туск сўзларини келтиради dpa.

Агентлик эслатишича, Полша бош вазири 2024 йил декабрида Украинага қўшин юбориш имкониятини аллақачон рад этган. Полша матбуотига кўра, Варшава тарихий сабабларга кўра бундай миссияда бевосита иштирок этишдан манфаатдор эмас – Иккинчи жаҳон урушигача бугунги ғарбий Украина ҳудудининг бир қисми Полшага тегишли эди, деб ёзади dpa.

Британия Украинага тинчликпарварлик контингентини юборишга тайёр

Бир кун аввал Буюк Британия бош вазири Кир Стармер Лондон хавфсизлик кафолатларини таъминлаш учун Украинага Британия тинчликпарвар контингентини юборишга тайёрлигини айтди. ОАВ маълумотларига кўра, Британия бош вазири ушбу ташаббусни Франция президенти Эммануэл Maкрoн билан муҳокама қилган. Шу билан бирга, Франция ташқи ишлар вазири Жан-Ноэл Барронинг таъкидлашича, ҳозирда Франция, Буюк Британия ва Полшадан қўшин юбориш бўйича музокаралар олиб борилмоқда.

Германия ҳукумати Украинага тинчликпарвар кучларни юбориш бўйича мунозараларни «вақтли» деб ҳисоблайди, дея аввалроқ айтганди Германия ҳукумати матбуот котиби ўринбосари Кристиан Хоффман. Унинг сўзларига кўра, биринчи навбатда «Украина учун тинчлик келадими ва у қандай бўлади», деб кутиш ва кўриш керак, шундан кейингина «шартлар ҳақида гаплашиб, нима қилиш мумкинлигини аниқлай оламиз».