“Америка олтин асри бунёдкорининг туғилган кунини байрам қиламиз” – конгресс аъзоси

Трамппараст конгрессвумен Клаудия Тенни қонун лойиҳаси тақдим этаркан, унда президентнинг туғилган кунини миллий байрам деб эълон қилиш ташаббуси илгари сурилди. Американинг олтин асри бунёдкорини муносиб тақдирлаб, туғилган кунини АҚШ давлат байроғи қабул қилинган кунга қўшамиз. Қонун лойиҳаси эса бу сана абадий нишонланишини таъминлайди, дейди қонунчи аёл. Жамоатчилик фаоллари Клаудия Теннининг масхарабозлигидан ғазабда.

АҚШда Доналд Трампнинг демократия демонтажи давом этади. Энди Трампга яхши кўринишни истаган қонунчилар унга хушомад қилмоқда. Колумбия округидан вакил, конгрессвумен Клаудия Тенни Доналд Трамп туғилган кун – 14 июн санасини федерал байрамга айлантиришни таклиф этиб, қонун лойиҳаси киритди. Унда Трамп туғилган сана ва байроқ қабул қилинган кун 14 июнни бирга нишонлаш ҳақида гап боради. Яъни президентнинг туғилган куни 1777 йилда АҚШ байроғи қабул қилинган санага тўғри келади. Клаудия Тенни Трампнинг Америка учун қўшган ҳиссалари ҳаққи унинг туғилган кунини энди федерал масштабда нишонлаш кераклигини айтмоқда. Конгрессвуменнинг пресс-релизида келишича, қонун лойиҳаси 14 июнни президент туғилган куни ва байроқ куни сифатида абадий нишонланишини таъминлаши керак.

Унинг туғилган куни ва байроқ кунини федерал байрам сифатида белгилаш орқали биз президент Трампнинг Америка буюклигига қўшган ҳиссаси ва Америка байроғининг аҳамияти абадий қонунда мустаҳкамланишини таъминлаган бўламиз, дейди Тенни.

Бу хабар турли ахборот платформаларига жойлаштирилар экан, кузатувчи ва обуначилар ўз жаҳлини яширмади. Улар Америка борган сари Трамп ерига айланаётгани, у Европа ва Украина душмани экани, ҳатто уруш борасида Хитойнинг берган яраш таклифи Трампникидан яхшироқ эканини ёзди. Трампнинг Украина учун берган таклифи шу қадар юзсизки, Хитойникидан баттар, деб ёзади бир ижтимоий тармоқ кузатувчиси.

Клаудия Тенни Хʼда пост қолдираркан, Трампни Жорж Вашингтонга тенглаштирди. Жорж Вашингтоннинг туғилган куни федерал байрам сифатида нишонланар экан, Американинг олтин асри бунёдкори сифатида Трампни тан олиб, унинг туғилган кунини федерал миқёсда байрам қилишимиз керак, шунинг учун ҳам қонун лойиҳасини киритдим, дейди Тенни.

Унинг обуначилари эса ҳа, бу жуда ажойиб фикр, нишонлайлик, дея муносабат билдиришган. Яна бир обуначи эса, ақлдан озманг, хоним, бундай саналар у ўлганидан кейин нишонланади. Яхшиси бор муаммоларга эътибор қаратинг, деб ёзган. Яна бир Х фойдаланувчиси эса Тенни ғоясини қўллаб, бундай байрамни августга кўчиришни илтимос қилган, чунки август ойида дам олиш кунлари кам эканини айтган. Лекин умумий ҳисобда олиб қараганда, Теннининг аудиторияси буни ёмон қабул қилган, унинг таклифини қоралаган.

Танқидчилар фикрича, Трамп қўлини ўпаётган хушомадчи Тенни хонимнинг бирор жиддий муаммоси борга ўхшайди, чунки охирги вақтлар жиноий ишларда айбланаётганлар ва жиддий муаммоси борлар Трампга хушомад қилмоқда.

Эслатиб ўтамиз, дунёда президент куни нишонланадиган давлатлар бор, масалан, АҚШнинг ўзида февралнинг 3-душанбаси президент куни сифатида нишонланади. Лекин камдан кам давлатларда маълум президентнинг туғилган куни миллий байрамга айлантирилган. Бу асосан авторитар, тоталитар ва диктатура бошқарувига эса мамлакатларга хос қадам. Масалан, Шимолий Кореяда ҳозирги раҳбар Ким Чен Иннинг отаси ва бобоси – Ким Чен Ир ҳамда Ким Ир Сенларнинг туғилган кунлари 16 феврал-15 апрел саналари кенг миқёсда умумхалқ байрами сифатида нишонланади. Улардан бири “Қуёш куни”, яна бир эса “Ёрқин юлдузлар куни” деб номланади. Туркманистоннинг биринчи президенти Сапармурот Ниёзов туғилган куни ҳам миллий байрам сифатида нишонланган, бироқ ҳозир давлат байрамлари таркибидан чиқарилган. Қозоғистонда 1 декабр Биринчи президент куни деб эълон қилинганди, чунки 1991 йилда Назарбоев айнан шу санада президентликка сайланганди. 2019 йилда бу байрам ҳам бекор қилинган. Таиландда қиролнинг туғилган куни байрам қилинади, Россияда Путин туғилган сана расмий байрам куни эмас. Лекин давлат ташкилотлари ходимлари бу санани нишонлайди. Трампнинг туғилган кунини байрам қилиш ташаббуси – ўта популистик, нодемократик ва кулгили ғоя бўлди.

Шоҳрух Мажидзода тайёрлади.