Давлатга қарашли бир қатор йирик компаниялар январда солиқ тўлашни қисқартирди

Ўзбекистон Солиқ қўмитаси 2025 йил январ ойида энг кўп солиқ тўлаган давлат ва хусусий сектордаги ўнтадан компанияни маълум қилди.

Йилнинг илк ойида давлатга тегишли энг йирик ўнта солиқ тўловчи жами 4,5 трлн сўм солиқ тўлаган. Бу – 2024 йилнинг январ ойи билан таққослаганда қарийб 120 млрд сўмга кам.

Топ-ўнталикка кирган компанияларнинг камида 6 таси ўтган ойда 2024 йил январига қараганда камроқ солиқ тўлаган.

Хусусан, солиқ тушумлари Навоий кон-металлургия комбинатидан 13 фоизга, Олмалиқ кон-металлургия комбинатидан 11 фоизга камайган.

Энергетика компанияларидан “Ўзбекнефтгаз” 44 фоизга, UzGasTrade 36 фоизга кам солиқ тўлаган. “Ўзтрансгаз” ва “Ҳудудгазтаъминот” ҳам солиқ тўловини қисқартирган.

Шу билан бирга, январ ойида “Навоийуран” ўтган йилнинг январига қараганда 2,4 баробарга, Asia Trans Gas 1,7 баробарга кўп солиқ тўлаган.

2025 йил январ ойида энг кўп солиқ тўлаган давлат компаниялари:

• НКМК – 2,08 трлн сўм (2024 йил январида 2,38 трлн, фарқ –13%);
• ОКМК – 639 млрд (707 млрд, –10%);
• Ўзкимёсаноат* – 388 млрд;
• Навоийуран – 299 млрд (87 млрд, +244%);
• Ўзбекнефтгаз – 280 млрд (497 млрд, –44%);
• Ҳудудгазтаъминот – 240 млрд (241 млрд, –0,4%);
• UzGasTrade – 218 млрд (343 млрд, –36%);
• Asia Trans Gas – 149 млрд (90 млрд, +65%);
• Алоқабанк – 117 млрд*;
• Ўзтрансгаз – 111 (118 млрд, –6%).

* Ушбу компаниялар 2024 йил январида топ-10таликда бўлмаган.

2024 йил январ ойида топ-10 таликда бўлган “Ўзбектелеком” (ўша ойда 105 млрд сўм солиқ тўлаган) ва “Ўзбекистон темирйўллари” (74 млрд) 2025 йил январда рўйхатдан жой олмаган.

ТОП-10 хусусий корхоналар

Январ ойида энг кўп солиқ тўлаган ўнта хусусий корхона қуйидагилар:

• Uzbat – 182 млрд;
• ADM Jizzakh – 62,2 млрд;
• Epsilon – 50,6 млрд;
• Капиталбанк – 48 млрд;
• Ҳамкорбанк – 47,6 млрд;
• Unitel – 47,6 млрд;
• Tashkent Tobacco – 42,3 млрд;
• TBC банк – 37 млрд;
• Coca Cola Ichimligi Uzbekistan – 36,7 млрд;
• PWS Optimum – 33,5 млрд.

Ушбу рўйхатда доимий етакчилик қиладиган Uzbat тўлаган солиқлар 21,2 фоизга, Капиталбанкники 40 фоизга қисқарганига қарамай, бошқа корхоналар кўпроқ солиқ тўлагани ҳисобига бу гуруҳдаги тушумлар ўтган йил январ ойи билан солиштирганда 83,7 фоизга ошган (716 млрд сўмдан 1,32 трлн сўмга).

Ўтган йил январида энг кўп солиқ тўлаган хусусий корхоналар рўйхатида 2-ўринда бўлган Enter Engineering (130 млрд сўм тўлаган) бу йил рўйхатга кирмаган – ҳолбуки рўйхатнинг охиридаги компания 33,5 млрд сўм солиқ тўлаб ТОП-10 га кирган.

2024 йил январида рўйхатда бўлмаган Epsilon Development Company 2025 йил январида 506 млрд сўмлик солиқ тушумлари билан бирданига учинчи ўринда қайд этилган.

Солиқ қўмитасига кўра, 2025 йилнинг илк ойида жами 956 та йирик солиқ тўловчи 8,51 трлн сўм солиқ тўлаган. Таққослаш учун, бир йил олдин 2186 та йирик солиқ тўловчидан 8,85 трлн сўм ундирилган эди.