Украина делегацияси Саудия Арабистонига борди. У ерда тинчлик музокаралари ўтказилиши мумкин

Украина ҳукумати делегацияси ишчи ташриф билан Саудия Арабистонига борди. Бу ҳақда мамлакат иқтисодиёт вазири Юлия Свириденко маълум қилди.

Унинг сўзларига кўра, украиналик амалдорлар аллақачон маҳаллий тадбиркорлар билан учрашув ўтказиб, энергетика, қишлоқ хўжалиги ва инфратузилма бўйича лойиҳаларини тақдим этган.

«Кейинги кунлар давомида президент Володимир Зеленскийнинг Саудия Арабистонига ташрифига тайёргарлик кўриш учун ўнлаб учрашувлар ўтказилади. Хусусан, минтақа давлатлари билан муҳим иқтисодий шартномаларни имзолашга тайёрланяпмиз», — дейди Свидиренко.

Ғарб ОАВ маълумотларига кўра, кейинги ҳафта Саудия Арабистонига АҚШ ва Россия вакиллари ташриф буюриб, Доналд Трамп ва Владимир Путиннинг бўлажак учрашувини муҳокама қилади. Тахминларга кўра, мазкур музокараларга Украина вакиллари ҳам қўшилиши мумкин. Трампнинг Путин билан учрашуви феврал охирларида бўлиб ўтиши режалаштирилган.

Шу билан бирга, Украина президенти офисининг раҳбари Андрей Ермак РФ вакиллари билан учрашув бўлмагани ва урушни якунлаш бўйича режа тайёрланмагунга қадар бўлмаслигини маълум қилди.

BBC Украина ҳукуматидаги юқори мартабали манбасига таяниб ёзишича, Киев делегацияси таклиф қилинмаган ва Саудия Арабистонида режалаштирилган тинчлик музокараларига жамоасини юбормаяпти.

Доналд Трамп 12 феврал куни Владимир Путин ва Володимир Зеленский билан телефон орқали мулоқот қилиб, Россия—Украина урушини тўхтатиш тўғрисидаги музокараларни бошлашга келишиб олганини эълон қилди. Зеленский бир неча бор Украина иштирокисиз ҳеч қанақа тинчлик музокараларни бўлмаслигини таъкидлаган.