Зеленский фойдали қазилмалар бўйича АҚШ билан келишувни нега имзоламаганини тушунтирди

Қўшма Штатларга Украинанинг фойдали қазилмаларидан фойдаланиш имконининг берилиши ҳақидаги келишувда ҳали Киев манфаатлари ҳимоя қилинмаган, деди Украина президенти Владимир Зеленский.

«Шартнома вазирлар даражасида имзоланади. Лекин мен президентман ва бу ҳужжатнинг сифатига таъсир қиламан. Шунинг учун вазирларга шартномани имзолашга рухсат бермадим, чунки у тайёр эмас, назаримда. У бизнинг манфаатларимизни ҳимоя қилишга ҳали тайёр эмас», деди у.

Президент таъкидлаганидек, унга Украинага сармоя киритиш ҳақида гапириш жуда муҳим ва бу келишувда қонунан тўғри ёзилиши керак.

«Ва кейин биз фойдани қандай тақсимлаш ҳақида ўйлашимиз мумкин, агар буларнинг барчаси хавфсизлик кафолатлари билан боғлиқ бўлса. Мен ҳужжатда бу алоқани ҳали кўрмаяпман», деди у ва бу алоқа аниқ бўлиши кераклигини қўшимча қилди.

NBC News манбаларига кўра, ҳужжат Вашингтоннинг ҳарбий ёрдам эвазига ноёб ер минералларининг 50 фоизини олиш ҳуқуқини назарда тутади.

АҚШ молия вазири Скотт Бессент 12 февраль куни Киевга ташрифи чоғида келишув лойиҳасини Украина президентига топширган.

14 февраль куни Зеленский келишувни имзолашдан «мулойимлик билан бош тортганини» хабар қилди. Reuters манбасига кўра, Украина келишувнинг ўз версиясини тайёрлаб, Америка томонига тақдим этган.

Украина ресурсларидан фойдаланишга имкон бериш масаласи Зеленский томонидан ўтган йилнинг кузида АҚШ президентига тақдим этган «ғалаба режаси»нинг бир қисми бўлган. Киев бу маълумотни тасдиқлаб, муҳокама, хусусан, литий ва титан конлари ҳақида бўлганини маълум қилган эди.

Украина ўз ресурсларини АҚШга бепул бермайди, балки уларни биргаликда ривожлантиришни таклиф қилмоқда, деди Зеленский 8 февраль куни. Трамп кейинроқ Киев ҳарбий ёрдамни давом эттириш эвазига 500 миллиард долларлик қимматбаҳо металларга киришни таъминлашга тайёрлигини маълум қилди.