Зеленский: Украинасиз тинчлик музокаралари қабул қилинмайди

Украина ўз иштирокисиз ҳеч қандай икки томонлама тинчлик музокараларини қабул қилмайди, деди мамлакат президенти Володимир Зеленский 13 феврал, пайшанба куни Хмелницкий атом электр станциясига ташрифи чоғида. Бундан ташқари, Украина президенти Европа давлатларининг бўлажак тинчлик музокараларида иштирок этишидан «жуда манфаатдор» эканини айтди.

Dpa агентлигининг ёзишича, Зеленский 14 феврал, жума куни бошланадиган Мюнхен хавфсизлик конференциясида Европа етакчилари билан ҳозирги вазиятни муҳокама қилишни режалаштирмоқда. Аввалроқ Доналд Трамп конференция доирасида Украина раҳбарияти ва Америка делегацияси ўртасида ҳам учрашув бўлиб ўтишини маълум қилганди.

Москва ва Вашингтон: Украина музокараларда иштирок этади

Аввалроқ Владимир Путиннинг матбуот котиби Дмитрий Песков Украина можарони ҳал қилиш бўйича музокараларда иштирок этишини, бироқ Вашингтон барибир Москванинг асосий «визависи» бўлиб қолишини айтди. «У ёки бу тарзда, албатта, Украина музокараларда иштирок этади. Албатта, бу мулоқотнинг икки томонлама Россия-Америка треки бўлади ва у Украинанинг иштироки билан боғлиқ бўлади», — деди у.

Песков, шунингдек, Трамп ва Путин ўртасидаги суҳбатда Россиянинг Украинага қарши урушини ҳал қилиш бўйича музокараларда европаликларнинг иштироки муҳокама қилинмаганини таъкидлади. Унинг сўзларига кўра, Европа давлатлари музокараларда «қандайдир тарзда ўз ўрнини эгаллаш учун Вашингтон билан гаплашиши» керак бўлади.

Кейинроқ АҚШ президенти Доналд Трамп Оқ уйда журналистлар билан суҳбатда Украина урушни тугатиш учун Россия билан музокара столидан жой олишини айтди.