АҚШ Украина билан иқтисодий битим тузмоқчи

АҚШ молия вазири Скотт Бессент Киевда унинг мамлакати қўллаб-қувватлаш эвазига Украина билан иқтисодий битим тузмоқчи эканини айтди.

АҚШ молия вазири Скотт Бессентнинг айтишича, Вашингтон Украинага ёрдам эвазига Украина билан иқтисодий келишувга эришмоқчи. «Биз иқтисодий ҳамкорлик бўйича келишув тузмоқчимиз», деди у 12 феврал, чоршанба куни Киевда Украина президенти Володимир Зеленский билан учрашувдан сўнг журналистларга.

Бунинг эвазига Қўшма Штатлар «Украина ва Украина халқига моддий ёрдам кўрсатишда давом этади», дея қўшимча қилди вазир.

Володимир Зеленский 14 феврал, жума куни бошланадиган Мюнхен хавфсизлик конференцияси (MSC)да АҚШ билан иқтисодий келишувларни имзолаш ниятида эканлигини айтди. Унинг қўшимча қилишича, расмийлар жамоаси кейинги икки кун давомида «Мюнхенда баъзи келишувларни якунлаш имкониятига эга бўлиш учун» ишлайди.

Трамп Украинага ёрдам эвазига нодир металларни олишни истамоқда

3 феврал куни АҚШ президенти Доналд Трамп Украина АҚШга нодир металлар етказиб беришга ваъда берса, унга ёрдам тақдим этиш давом этишини айтди. «Биз Украинага уларда жуда қимматли ноёб металлар борлигини айтамиз, - деди у Оқ уйнинг Овал идорасида журналистларга. - Биз Украина билан шартнома тузмоқчимиз, унда улар биз бераётган нарсани ноёб металлар ва бошқа нарсалар билан таъминлайди».

Трамп Киевдан Вашингтонга ресурслар етказиб берилишини хоҳлайдими, деган саволга президент ижобий жавоб бериб, ноёб металлар бўйича «кафолатга эга бўлиш кераклиги» ҳақида таъкидлади. Унинг таъкидлашича, Украина бунга аллақачон тайёр. Оқ уй раҳбарининг сўзларига кўра, у Киевдан кўрсатилган ёрдам учун Вашингтонга «деярли 300 миллиард доллар товон тўлашини» истайди.

7 феврал, жума куни Володимир Зеленский Украина ўзининг фойдали қазилмалари захираларини, жумладан, ноёб металларини Ғарбга «беришни» истамаслигини айтди. Киев ўзининг ғарбий ҳамкорларига АҚШ билан конларга кириш бўйича устувор ҳуқуқни олиш учун ўзаро манфаатли ҳамкорликни таклиф қилади.

«Америкаликлар энг кўп ёрдам берди, шунинг учун америкаликлар энг кўп пул топиши керак. Улар бу устуворликка эга бўлишлари керак ва улар бунга эришадилар. Мен бу ҳақда президент Трамп билан гаплашмоқчиман», — дея таъкидлади у.