Tesla Хитой электромобилларига жорий этилган божлар туфайли Еврокомиссия устидан шикоят қилди

Tesla Брюссел томонидан Хитой электромобиллари импортига бож жорий этилгани сабаб Европа комиссиясига қарши даъво аризасини киритди. Бу ҳақда Европа суди ҳужжатларига таяниб, Financial Times хабар берди.

Фото: Reuters

Бундан олдин шу каби даъволар Германиянинг Bayerische Motoren Werke AG ва Хитойнинг BYD Co., Geely Automobile Holdings Ltd. ҳамда SAIC Motor Corp. автомобилсозлик компаниялари томонидан киритилган эди.

Қайд этилишича, 2024 йилда ЕИда сотилган барча электромобилларнинг қарийб бешдан бир қисми (300 мингга яқин) Хитойда йиғилган. Tesla штаб-квартираси АҚШда жойлашганига қарамай, ўз автомобилларининг кўп қисмини Хитойда ишлаб чиқаради.

Маълумотларга кўра, Еврокомиссияга қарши иш умумий юрисдикциядаги Европа суди томонидан кўриб чиқилади, унинг қарори устидан Инсон ҳуқуқлари бўйича Европа судига шикоят қилиш мумкин бўлади. Жараён 18 ойгача давом этиши мумкин.

Хитой электромобилларига қарши 35,3 фоизли божлар 2024 йилнинг октябрида жорий этилганди. Бунга Пекин ички бозорни рағбатлантириш орқали адолатли рақобатга тўсқинлик қилаётгани бўйича олиб борилган суриштирувлар сабаб бўлган.

Хитой электромобиллар учун божлар туфайли ЕИ устидан ЖСТга шикоят қилган

Пекин ХХРда ишлаб чиқарилган электромобилларни Европа Иттифоқига олиб киришга қўшимча божлар жорий этиш тўғрисидаги Еврокомиссия қарори устидан Жаҳон савдо ташкилотига (ЖСТ) расман шикоят қилган. Таъкидланишича, Брюсселнинг қарори ЖСТ қоидаларига зид келади ва «иқлим ўзгаришига қарши курашда глобал ҳамкорликка» путур етказади.

Идора Европа комиссиясини «зудлик билан ўзининг нотўғри амалиётини тузатишга» ҳамда «Хитой ва Европа Иттифоқи ўртасидаги иқтисодий ва савдо-сиёсий ҳамкорлик барқарорлигини, шунингдек, электромобиллар учун саноат ва логистика занжирларини биргаликда сақлашга» чақирган эди.

#Tesla #электромобиллар