Илон Маскнинг DOGE раҳбари лавозимидаги фаолияти сабаб Tesla’га қарши бойкот бошланди

Илон Маскнинг Доналд Трамп маъмуриятидаги ҳаракати АҚШда Tesla маҳсулотларига бойкот эълон қилинишига ва ушбу компаниянинг автосалонлари қаршисида норозилик намойишлари бошланишига олиб келди.

Ўтган дам олиш кунлари намойишчилар Tesla’нинг Вашингтон, Питсбург, Минниеаполис, Анн-Арбор (Мичиган штати) ҳамда Калифорния штатининг бир қатор шаҳарларида жойлашган шоурумлари қаршисида тўпланди. «Халқ Tesla’га боғлиқ барча нарсага бойкот эълон қилиши керак. Шундай қилиш керакки, улар фойда кўра олмасин ва демократиямизни бузмасин», — дейди намойишчилар.

АҚШда норозилик кучайишига Илон Маскнинг иммиграция қонунчилигини кучайтириш ва ижтимоий дастурларни молиялаштиришни кескин қисқартириш ҳақидаги кўплаб баёнотлари сабаб бўлди – Маск АҚШ ижтимоий таъминот тизимини тарихдаги энг йирик фирибгарлик деб атаган.

Калифорниядаги норозилик намойиши иштирокчилари нафақат Tesla’ни бойкот қилишга, балки Трамп маъмуриятидаги Илон Маскнинг ҳаракатларига ҳам чора кўришга чақирди. «Битта одамда бутун ҳукуматдагидан кўпроқ пул бўлса, бу тўғри эмас», — дейди Лос-Гатос шаҳридаги акция иштирокчилари.

Маълумот учун, Маск Трампнинг сайловолди кампаниясига қарийб 75 миллион доллар хайрия қилган ва бу уни сайлов даврининг энг йирик донорларидан бирига айлантирган эди. Шунингдек, у бир неча бор сиёсатчини қўллаб-қувватловчи митингларда сўзга чиққан.

Трамп ҳокимиятга келганидан кейин Маск ҳукумат самарадорлиги департаменти (DOGE) раҳбари этиб тайинланди. 2024 йил декабр ойида The Washington Post Маскни «хуфиёна президент» деб атади. 2025 йил феврал ойида TIME журнали АҚШ президентлик курсисида ўтирган Маск тасвирланган муқова билан чиқди.