Илон Маск украиналик 10 нафар олигархга қарши санкциялар жорий этиш таклифини берди

Америкалик бизнесмен санкцияларни биринчи навбатда Монакода кошоналари бор олигархларга нисбатан жорий этиш кераклигини таъкидлади.

Фото: REUTERS

Миллиардер ва АҚШ Ҳукумат самарадорлиги департаменти (DOGE) бошлиғи Илон Маск украиналик ўн нафар олигархга қарши санкциялар жорий этиш таклифини илгари сурди. Бизнесмен айнан кимларга қарши чекловлар жорий этиш кераклигига ойдинлик киритмаган.

«Ўн нафар украиналик олигархга қарши санкциялар жорий этинг, айниқса, Монакода кошоналари борларга қарши ва бу зудлик билан тўхтайди. Жумбоқнинг калити шу», — деб ёзади Маск. Бу ҳақда у Оқ уй олдида ёйилган улкан Украина байроғи видеоси муаллифининг постига жавобан ёзиб қолдирди. Шунингдек, Маск ушбу акцияни ким молиялаштиргани ва у қанчага тушгани тўғрисидаги саволни ўртага ташлади.

Бундан ташқари, Илон Маск Starlink сунъий йўлдош интернет тизими — бу «Украина армиясининг таянчи» эканини маълум қилди. Унинг сўзларига кўра, тизимнинг ўчириб қўйилиши фронт чизиғида Украина Қуролли кучларининг ҳалокатига олиб келади. Украина бўлинмалари жанговар ҳаракатлар амалга ошириладиган ҳудудлар билан алоқани таъминлашда Starlink’дан фойдаланмоқда.

2021 йилда АҚШ украиналик бизнесмен Игор Коломойский ҳамда унинг оиласига қарши санкциялар қўллаган. Тадбиркор Днепропетровск области губернатори лавозимида ўтирганида коррупцияга йўл қўйганликда айбланган. 2025 йил февралда Одесса мэри Геннадий Трухановга нисбатан ҳам санкциялар қўллаш имконияти кўриб чиқилаётгани маълум бўлганди. Америка томонининг ҳисоблашича, мэрнинг Одессадаги жиноий гуруҳларга алоқадорлиги бор, шунингдек, тўртта офшор компаниянинг катта миқдордаги акцияларига эгалик қилади.

#Илон Маск #олигархлар