WSJ: Илон Маск супермиллиардерлар рейтингида етакчига айланди

Tesla ва Space X компаниялари раҳбари Илон Маск 419,4 млрд доллар билан дунёнинг энг бадавлат инсонига айланди.

Фото: Getty images

АҚШ Ҳукумат самарадорлиги департаменти (DOGE) раҳбари Илон Маск супермиллиардерлар рейтингида пешқадамга айланди. Бу ҳақда Altrata рейтинг компанияси маълумотларига таяниб, The Wall Street Journal хабар берди.

Рейтингга 24 нафар миллиардер киритилган бўлиб, Маск 2025 йил февраль ҳолатига кўра, 419,4 миллиард доллар билан дунёнинг энг бадавлат инсонига айланган.

Бундан ташқари, рейтингдан Amazon асосчиси Жефф Безос (263,8 миллиард доллар), Франциянинг ҳашаматли буюмлар ишлаб чиқарувчиси LVMH эгаси Бернар Арно (238,9 миллиард доллар), Oracle Corporation дастурий таъминоти асосчиларидан бири Ларри Эллисон (237 миллиард доллар) ҳамда Meta корпорацияси раҳбари Марк Цукерберг (220,8 миллиард доллар) ҳам ўрин олган.

Рейтингнинг олтинчи поғонаси Google асосчиларидан бири ҳисобланган Сергей Бринга насиб этди — унинг бойлиги 160,5 миллиард долларга баҳоланган.

WSJ’нинг қайд этилишича, дунёнинг энг бадавлат 24 инсонининг жами бойлиги 3,3 триллион долларни ташкил этади. Шу билан бирга, уларнинг 16 нафарининг бойлиги 100 миллиард доллардан ошади.

Эслатиб ўтамиз, ўтган йилнинг декабрида The Guardian америкалик тадбиркор Илон Маск 2027 йилга бориб дунёдаги биринчи доллардаги триллионерга айланиши мумкинлиги ҳақида ёзганди. Ҳисоб-китобларга кўра, Маскнинг бойлиги йилига ўртача 110 фоизга ўсмоқда.

#миллиардер #Илон Маск