American Airlines авиакомпанияси АҚШга барча рейсларни тўхтатди

Американинг энг йирик авиакомпанияларидан бири бўлган American Airlines «техник носозлик» сабаб АҚШга парвозларини тўхтатаётганини маълум қилди. Қўшма Штатлар Федерал фуқаролик авиацияси бошқармаси компания парвозлари тўхтатилишини тасдиқлади, деб хабар беради Reuters.

«Айни вақтда American Airlines томонидан амалга ошириладиган барча рейсларда техник носозлик кузатилмоқда. Сизнинг хавфсизлигингиз — бизнинг устувор вазифамиз. Муаммо бартараф этилиши билан биз сизни соғ-саломат белгиланган манзилга элтиб қўямиз», — дейилади компаниянинг Х ижтимоий тармоғидаги хабарида.

Ижтимоий тармоқнинг бошқа фойдаланувчилари саволларига жавоб берар экан, авиакомпания носозликни бартараф этиш қанча вақт олишини билмаслигини маълум қилди. Шунингдек, American Airlines айнан нима содир бўлганига ҳам ойдинлик киритмаган.

ABC News’нинг қайд этишича, носозлик Рождество ва байрам кунлари яқинлашаётган паллада содир бўлмоқда — АҚШда бу пайтда саёҳатлар оқими ортиб кетади.

Reutersʼнинг ёзишича, охирги маротаба American Airlines парвозларнинг кенг кўламли тўхтатилиши ҳақида Windowsʼда кузатилган глобал носозлик фонида эълон қилганди.