Москвада Колумбия картели аъзолари ярим тонна кокаин билан қўлга тушди

Федерал хавфсизлик хизмати ва божхона хизмати Перудан Россия орқали Европа Иттифоқига кокаин олиб ўтмоқчи бўлган Колумбиянинг «Кали» картели аъзоларини қўлга олди, деб хабар беради The Moscow Times.

Қайд этилишича, савдогарлар Москвага юк машинаси билан боғлиқ иш баҳонасида келган, унинг ичига эса гиёҳвандлик воситалари яширилган бўлган. Машинанинг ўзи ҳали йиғилмаган ҳолатда бўлгани божхоначиларда шубҳа уйғотган: агрегатлар орасида ортиқча буюмлар бўлиши мумкин эди. Сочиб ташланган юк машинаси Москва вилоятидаги омборда сақланган. Колумбияликлар унинг ичидан кокаинли брикетларни чиқариб олиб, юк контейнеридаги бошқа бир яширин бўлмага жойлаштирмоқчи бўлган.

Картел аъзоларидан 570 килограмм кокаин мусодара қилинган бўлиб, унинг чакана нархи 5,5 миллиард рублдан ошади. Ҳолат бўйича жиноят иши қўзғатилган, чет эл фуқаролари ҳибсда сақланмоқда. Таъкидланишича, наркосавдогарлар ортидан кузатув бир неча йил олдин бошланган ва унга божхона хизмати ҳам жалб этилган, шунингдек, Лотин Америкаси билан ташқи иқтисодий алоқалар мониторинги олиб борилган.

Бу жорий йилда Петербург орқали юборишга уринилган энг йирик партия эмас. 3 июл куни Эквадордан келган бананлар қутисидан 3,2 тонна кокаин аниқланган эди.

Россия Федерал божхона хизмати маълумотларига кўра, 2023 йилнинг январ-сентябр ойларида божхоначилар томонидан жами 22 тоннадан ортиқ гиёҳвандлик воситалари мусодара қилинган — бу ундан олдинги йилга нисбатан 16 фоизга кўп.